Krasniqi përmes një postimi në Facebook, ka thënë se Al-Sahlanin e ka njoftuar me vizionin e PDK-ë për përfaqësim të barabartë gjinor, në të gjitha strukturat e partisë.
“Duke prerë flokët e saj gjatë seancës së Parlamentit Evropian, në mbështetje të protestave anti-qeveritare në Iran, eurodeputetja nga Suedia, Abir Al-Sahlani, nxiti një valë të fuqishme reagimesh mbështetëse, duke tërhequr vëmendjen e të gjithë botës. Në një takim frymëzues që kisha sot me të në Bruksel, diskutuam për nevojën e fuqizimit të grave në politikë dhe në vendimmarrje, me ç’rast e njoftova me vizionin e PDK-së për përfaqësim të barabartë gjinor, 50/50, në të gjitha strukturat e partisë”, ka shkruar ai.
Po ashtu, Krasniqi thotë se eurodeputeten Al-Sahlani e ka falënderuar për mbështetjen e saj për aspiratën e PDK-së për anëtarësim në ALDE.
“Duke e përgëzuar për punën e saj të palodhshme dhe konsistente në mbrojtje të kauzave të rëndësishme, eurodeputeten Al-Sahlani e falënderova edhe për mbështetjen e saj për aspiratën e PDK-së për anëtarësim në ALDE. Po ashtu, e inkurajova që të vazhdojë aktivizimin e saj politik në mbështetje të grave iraniane dhe për fuqizimin e barazisë gjinore kudo në botë”, tha ai. /Teve1.info/
