Për Lipjanin është bërë e ditur nga kreu i kësaj komune, Imri Ahmeti si dhe për Drenasin nga kryetari i saj, Ramiz Lladrovci.
“Komuna e Lipjanit fituese e Çmimit Evropian për Qeverisje të Shkëlqyer. Sot kemi pranuar një lajm të mrekullueshëm, Komunës së Lipjanit i është dhënë Çmimi Evropian për Qeverisje të Shkëlqyer. Komuna jonë ka përfunduar me sukses procesin e vlerësimit për Çmimin Evropian të Qeverisjes së Shkëlqyer (ELoGE) dhe ka arritur një nivel të lartë të qeverisjes, të krahasuar më 12 Parimet e Këshillit të Evropës në kuadër të Qeverisjes së Mirë Demokratike”, ka shkruar Ahmeti në një postim në Facebook.
Për këtë çmim edhe Lladrovci ka falënderuar zyrtarët dhe drejtuesit e Shoqatës Evropianë për Demokraci Lokale për vlerësimin.
“Kryetari i Komunës së Drenasit, Ramiz Lladrovci, ka deklaruar se është njoftuar nga Shoqata Evropiane për Demokraci Lokale se Komuna e Drenasit është shpërblyer me Çmimin Evropian për Qeverisje të Shkëlqyer. Dua të falënderoj zyrtarët dhe drejtuesit e Shoqatës Evropiane për Demokraci Lokale -Alda për vlerësimin, zyrtarët përgjegjës të Komunës së Drenasit dhe kontribuuesit të cilët me përkushtim kanë zbatuar parimet e garës ku ne kemi fituar këtë çmim prestigjioz”, ka deklaruar Lladrovci. /Teve1.info
