Kompania Kosovare për Distribuim me Energji Elektrike ka njoftuar se është gjuajtur me armë zjarri dy herë brenda javës, trafostacioni në Balloc të Podujevës.
Përmes një njoftimi për media, nga KEDS-i kanë thënë se rasti i parë ka ndodhur më 5 nëntor, ku sipas tyre, persona të panjohur edhe për policinë kishin gjuajtur me armë dhe e kanë dëmtuar trasnformatorin “Balloc 2 Bunjaket”
“Ekipet tona kanë denoncuar rastin në polici me datë 06.11.2022. Pas kësaj të nesërmen ne e kemi ndërruar transformatorin dhe e kemi kthyer furnizimin me energji elektrike. Sipas banorëve të kësaj lagjeje atë natë ka ndodhur një tentativë vjedhjeje në një shtëpi afër vendit ku ndodhet transformatori. Sipas banorëve të kësaj lagje policia është duke e ndjekur rastin”, thuhet në njoftim.
Po ashtu, nga KEDS-i kanë bërë të ditur se një rast i ngjashëm ka ndodhur edhe sot në të njëjtin trafostacion, ku është djegur paneli i tensionit të ulët.
“Për këtë rast sërish është njoftuar policia dhe është hapur rasti. Për shkak të këtij dëmtimi të qëllimshëm kemi rreth 120 konsumatorë pa energji elektrike. KEDS dënon fuqishëm rastet e tilla, nga të cilat pos dëmtimit të aseteve, e pësojnë edhe konsumatorët”, thuhet në njoftimin e KEDS-it.
Ndërkaq, nga kjo kompani i kanë bërë thirrje Policisë së Kosovës, që rastet e tilla të trajtohen me prioritet në mënyrë që raste të tilla të mos përsëriten. /Teve1.info/