Kryetari i trupit gjykues, Sahit Krasniqi tha se dëshmia e Manit është shumë e rëndësishme, pasi sipas tij, menjëherë pas ngjarjes, Mani ishte kontaktuar nga Dardan Krivaqa dhe nëna e tij, për t’i parë incizimet e kamerave të sigurisë.
Mani punon në një kompani sigurimi privat “Syri i Shqiponjës”, i cili ka qenë tek banesa e Dardan Krivaqës.
Trupi gjykues Manin e cilësoi si shumë relevant në këtë rast.
“Dëshmia e këtij dëshmitari është e domosdoshme, pasi ai ka thënë se pas ngjarjes ishte kontaktuar nga Dardan Krivaqa dhe nëna e tij, për t’i parë incizimet e kamerave të sigurisë. Duhet ta shtyjmë shqyrtimin gjyqësor pasi ky dëshmitar nuk është dhe prindi i tij ka deklaruar se Besart Mani, posa të vij në Kosovë do të lajmërohet. Jemi të interesuar që ta sigurojmë këtë dëshmitar”, tha Sahit Krasniqi, kryetar i trupit gjykues.
