Këtë bindje e ka politikani socialdemokrat, Nenad Çanak, i cili protestën e organizuar nga Lista Serbe e quan thjesht një shfaqje dhe një kërcënim me armë bosh.
Sipas, tij, Kremlini është i gatshëm të fillojë çdo luftë vetëm ta largojë vëmendjen e komunitetit ndërkombëtar nga Ukraina.
E ai thotë se Ballkani, ka shumë pika të nxehta ku mund të ndizet edhe luftë.
“I gjithë aktiviteti është organizuar nga shërbimi rus dhe pjesë të shërbimit serb. Qëllimi i protestës ishte ta largojë vëmendjen e bashkësisë ndërkombëtare nga Ukraina. Kremlini është i gatshëm të fillojë çdo luftë në Ballkan vetëm për të dobësuar vëmendjen e Perëndimit, dhe kjo po synohet të bëhet në pikat e nxehta, siç janë Kosova, Mali i Zi dhe Bosnja dhe Herzegovina. Gjithçka që u pa në atë protestë ishte një shfaqje dhe një kërcënim me armë bosh”, deklaroi Çanak.
Ndryshe protestën e ka parë aktivisti nga shoqëria civile Miodrag Miliçeviq.
Ai thotë se komuniteti serb ka më shumë nevojë për pluralizëm politik, ndërsa sa i përket zhvillimeve të fundit politike, sipas tij, ka një unitet mes të gjitha palëve.
Miliçeviq thotë se Qeveria e Kosovës në këtë rast nuk e ka dëgjuar zërin e komunitetin serb, për çështjen e targave.
“Natyrisht që ne kemi dëshire që të ketë më shumë pluralizëm në mesin e komunitetit serb. Por lidhur me zhvillimet e fundit që kanë ndodhur nuk kanë të bëjnë vetëm me Listën Serbe. Mes partive politike në veri, ka pasur një konsensus të përgjithshëm për largimin e serbeve nga institucionet. Me çfarë shoh unë gjithashtu qytetarët janë shprehur të zhgënjyer me Qeverinë e Kosovës për shkak se nuk është dëgjuar zëri i tyre. Qytetarët janë ata që më së shumti po e pësojnë me këto zhvillime”, deklaroi Miliçeviq.
Ndërkaq Profesori nga Johns Hopkins University, Daniel Serwer nuk e përjashton mundësinë e tensioneve në veri të vendit.
“Dominimi i etno-nacionalistëve dhe kriminelëve atje në Mitrovicën e Veriut, mund të krijoj trazira. Në këto momente nuk po ka asnjë kuptim procesi i dialogut”, u shpreh Serwer.
E sipas Kryeministrit të Kosovës, Albin Kurtit, Aleksandar Vuçiq është duke i përdorur serbët ne Kosovë me qëllim për ta destabilizuar vendin, për shkak se nuk është pajtuar me planin franko-gjerman.
Kronika e gazetarit Shpat Blakçori.
