Kompozitori dhe muzikanti shqiptar Tish Daija u lind më 30 janar 1926 në Shkodër, në një familje artizanësh.
Ende pa hyrë në shkollë ai bëhet pjesëtar i korit françeskan. Në moshën 10–vjeçare merr pjesë në grupin muzikor “Antoniane”, drejtuar nga Prenkë Jakova dhe filloi t’i bjerë klarinetës, saksofonit dhe disa veglave të tjera muzikore.
Në moshën 13-vjeçare ai krijoi këngët e tij të para si “Çik, o mori çik”, “Ndal bre vashë”, “Me lule të bukura”, ‘’Sylarushe”, këngë të cilat ende sot janë mjaft popullore dhe këndohen nga këngëtarë të ndryshëm.
Në vitin 1946 pasi mbaron studimet, Tish Daija emërohet mësues muzike në Vlorë. Në vitin 1956 diplomohet si kompozitor.
Daija dha kontribut të madh edhe në Ministrinë e Arsimit dhe Kulturës ku punoi për 6 vjet. Në vitin 1962 emërohet në Ansamblin e Këngëve dhe të Valleve Popullore ku organizoi një sërë koncertesh brenda dhe jashtë trojeve shqiptare, shkruan KP.
Për gjithë veprimtarinë, kontributin dhe punën e palodhur që dha për muzikën shqiptare, ai u nderua me titujt “Artist i Popullit” dhe “Profesor”.
