Në raport me numrin e popullsisë, përdorimi i internetit në Kosovë është mbi 95%. Përpos lehtësirave që solli interneti, ai ka krijuar një vatër të re për keqpërdorime e krime. Sepse për njëmbëdhjetë muaj të këtij viti, në Policinë e Kosovës janë raportuar 892 raste të mashtrimeve në internet.
“Disa prej rasteve të krimit kibernetik dhe rasteve që mundësohen të kryhen përmes internetit janë: Viruset kompjuterike, Peshkimi i të dhënave, Mashtrimet në ueb-faqe dhe rrjete sociale, dhe Mashtrimet e bizneseve përmes internetit” thuhet në përgjeigjen e Policisë për Tëvë1.
E nga viti i kaluar, sipas Raportit të Progresit, 37 raste të raportuara si sulme kibernetike nuk janë zbuluar nga policia dhe prokurori.
Por llojet e sulmeve më të cilat janë përballur institucionet e vendit këtë vit, sipas njohësit të kibernetikës, kishin pasoja të përkohshme.
Pjesë e legjislacionit, tanimë është edhe Ligji për Sigurinë Kibernetike, i cili shtoi veprat penale për kibernetike, me dënime nga 2 deri në 7 vjet.
“Shpërndarja kompjuterike e materialeve pro gjenocid ose krimeve kundër njerëzimit e cila dënohet prej 3 deri në 6 vjet; Përgjimi i të dhënave kompjuterike që dënohet prej 1 deri në 5 vjet; Kanosja me motive racizmi përmes kompjuterit që dënohet deri në 3 vjet; Shpërndarja e materialeve raciste në publike e cila dënohet deri në 2 vjet; Pengimi i funksionimit të sistemeve kompjuterike që dënohet prej 3 deri në 7 vjet; Keqpërdorimi i pajisjeve dhe programeve kompjuterike që dënohet prej 6 muaj deri në 5 vjet; Falsifikimi kompjuterik që ndëshkohet deri në 6 vjet; Mashtrimi kompjuterik për të cilin janë paraparë deri në 5 vjet burgim”, tha Driart Elshani, njohës i kibernetikë
Përmes këtij ligji, parashihet krijimi i Autoritetit Shtetëror për Siguri Kibernetike, dhe themelimi i dy ekipeve shtetërore, njëri për reagim ndaj emergjencave kompjuterike dhe tjetri për reagim ndaj incidenteve të sigurisë kompjuterike.
Mirëpo Elshani, edhe pse këto i sheh si zhvillime pozitive, ai konsideron se nuk janë të mjaftueshme.
Nga sulmet që institucionet publike pësuan gjatë vitit 2022, Qeveria e Kosovës kishte njoftuar se asetet shtetërore kanë mbetur të paprekura.
Kronika e gazetares, Florijeta Dernjani.
