Policia e Kosovës ka bërë të ditur se tre zyrtarë kufitarë patrullues dyshohet se janë kidnapuar nga forcat serbe.
Sipas PK-së të njëjtin kanë qenë me detyrë në pikën statike të quajtur Tresavë/Bare thellë brenda në territorin e Republikës së Kosovës, për të parandaluar shfrytëzimin e rrugëve ilegale, të cilat shfrytëzoheshin nga grupet kriminale për kalim ilegal dhe kontrabandë.
“Sot, në mesditë nga njësiti policor i cili ishte në përbërje prej tre zyrtarëve kufitar, kanë njoftuar se në afërsi të pikës statike kanë vërejtur person/a të maskuar dhe të armatosur, me këtë rast në drejtim të kësaj pike në asistencë janë nisur njësi shtesë të PK-së”, thuhet në njoftimin e PK-së.
Sipas policisë me të mbërritur në lokacion, njësitet zyrtare kanë parë veturën zyrtarë por jo edhe zyrtarët policorë.
“Në drejtim të këtij lokacioni menjëherë kanë shkuar edhe njësite tjera policore, si dhe janë informuar edhe institucionet tjera të sigurisë, përfshirë KFOR-in, pasi dyshohet se zyrtarët policor janë kidnapuar nga forcat serbe”, thuhet në komunikatë.
PK ka bërë të ditur se ka kontaktuar mekanizmat vendorë e ndërkombëtarë që policët të lirohen sa më parë.
