Katër persona arrestohen për dhunë në familje në Gjilan
Policia e Kosovës ka intervenuar në katër raste të dhunës në familje në Gjilan gjatë fundjavës, ku si pasojë janë arrestuar katër persona të dyshuar.
Sipas raportit 24-orësh të Policisë, rasti i parë është regjistruar më 13 nëntor, kur një shtetas i Maqedonisë së Veriut dyshohet se kishte ushtruar dhunë psikike ndaj një gruaje kosovare. I dyshuari është arrestuar një ditë më vonë.
Një tjetër rast është raportuar më 15 nëntor, ku një burrë kosovar dyshohet se ka ushtruar dhunë psikike ndaj një gruaje kosovare dhe është arrestuar nga policia.
Ndërkaq, dy raste të tjera janë regjistruar më 14 dhe 15 nëntor. Në njërin rast, një burrë dyshohet se ka ushtruar dhunë fizike dhe psikike ndaj një burri tjetër, ndërsa në rastin tjetër një person dyshohet se ka ushtruar dhunë psikike ndaj një burri kosovar.
Policia ka bërë të ditur se të katër të dyshuarit, me vendim të prokurorit të shtetit, janë dërguar në mbajtje.







