Kontaktin e fundit me familjen Mirjeta Zeka e pati gjashtë vite më parë.
Që nga korriki i vitit 2019 familja nuk ka asnjë gjurmë nga ajo.
Gjithçka nisi pas një pushimi pranveror që Mirjeta dhe bashkëshorti kishin ardhur ta kalojnë në Kosovë, por që në Gjermani, nuk u kthyen të dy bashkëshortët.
“Kanë pasur në plan që të qëndrojnë për dy javë, por pasi kanë kaluar këto dy javë, bashkëshorti i saj, në mesin e prillit është kthyer në Gjermani, kurse Mirjeta nuk ka dalë sipas informata nga pikat kufitare dhe aeroporti, nuk ka dalë asnjëherë nga Kosova”, tha avokati i Familjes Zeka, Amer Alija.
Familjen e Mirjetës, bashkëshorti i saj, e kishte njoftuar në korrik se ajo nuk është asgjëkundi.
Që nga ajo kohë, janë zhvilluar disa kërkime në lumin Ibër e lumin Sitnica, por pa rezultat.
Prokuroria Themelore në Mitrovicë kishte intervistuar bashkëshortin e Mirjetës, ku ai ishte mbrojtur në heshtje.
Nga familja thonë se motra e tyre asnjëherë nuk ishte ankuar për ndonjë keqtrajtim nga ana e bashkëshortit, por që ka pasur gjëra të cilat i kanë vërejtur vet këta.
Ata shprehin shqetësim për mos trajtimin e rastit të motrës së tyre.
Ndërkaq, hetimet për zhdukjen e Mirjeta Zekës janë kryer nën cilësimin si “vrasje e rëndë”.
“Vepra penale në hetime është kualifikuar si “Vrasje e rëndë” dhe si e tillë nuk mund të parashkruhet shpejtë…….Të intensifikohen hetimet dhe jo të pret Prokuroria që mos po i shkon ndonjë dëshmi vet në zyre”, tha Alija.
E vitin e kaluar, kjo prokurori i pezulloi hetimet e saj.
Televizioni ka tentuar të marrë qëndrim nga ky institucion, por nuk ka marrë përgjigje.
Përfaqësuesi ligjor i familjes Zeka, veprimet e kësaj prokurorie i kritikon për zvarritje e neglishencë.
Madje, ka bërë parashtrime në Prokurori Speciale e Zyrë të Kryeprokurorit të Shtetit që ky rast të transferohet në Prokurori Speciale.
“Po pret që t’i intervistojë disa familjarë të të dyshuarit dhe unë nuk e shoh si arsye që gjashtë vite të pritet intervistohen familjarët, andaj mendoj që ky rast është duke u neglizhuar dhe urgjentisht duhet të kalojë tek Prokuroria Speciale apo të formohet një ekip i prokurorëve, i cili bashkërisht do të angazhohej në ndjekjen apo ndriçimin e këtij rasti”, deklaroi Alija.
Edhe publikisht, familja Zeka ka kërkuar nga organet e drejtësisë që rasti i motrës së tyre të zbardhet.
