Kabineti Qeveritar ka miratuar propozim-vendimin për emërimin e Gazmend Hoxhës drejtor të Policisë.
Zv/ministri i Brendshëm Bardhyl Dobra ka thënë se në mesin e tre kandidatëve me vlerësimin më të lartë për këtë pozitë, ministri Sveçla ka rekomanduar Gazmend Hoxhën për drejtor të PK-së
“Më lejoni që të propozoj para jush propozim-vendimin për kandidatin e propozuar për emërim në pozitën e Drejtorit të Përgjitshëm të Policisë së Kosovës. Siç u tha në pajtim me dispozitat ligjore të Ligjit për Policinë, Ministria e Brendshme ka zhvilluar procedurat e rekrutimit për pozitën Drejtor i Përgjithshëm me qëllimin plotësimin e pozitës së lirë të punës.. Në konkursin e shpallur anë aplikuar 5 kandidatë kurse 4 janë futur në listë të ngushtë dhe janë ftuar në intervistë”.
“Pas vlerësimit profesional nga komisioni përkatës në polici, Ministrit të Punëve të Brendshme i janë rekomanduar tre kandidatë me vlerësimin më të lartë sipas radhës: Gazmend Hoxha, Granit Fetahu dhe Bahri Shala. Në pajtim me kompetencën ministri i propozon Qeverisë si kandidat për pozitën e drejtorit të Policisë z. Gazmend Hoxha”, ka thënë Dobra.
Hoxha deri tash mbante pozitën e drejtorit të Operacioneve në Policinë e Kosovës. Ai në mesin e kandidatëve për të parin e Policisë së Kosovës, ishte kandidati më i vlerësuar edhe nga ekspertët e angazhuar nga Ambasada Britanike.
Policia udhëhiqej nga U.D i drejtorit, Fehmi Hoti që nga 30 gushti i vitit të kaluar. Ai ishte caktuar në atë pozitë pas dorëheqjes së Samedin Mehmetit në po atë ditë.
