41 persona të cilët u helmuan në një lokal ushqimi në Malishevë, aktualisht po trajtohen në spitalin e Prizrenit. Gjendja e tyre është stabile.
Përmes një postimi në Facebook, Komuna e Malishevës bën të ditur se nënkryetari i komunës, Vesel Krasniqi dhe drejtori për Shëndetësi, Hajdin Berisha kanë vizituar pacientët e helmuar, përcjell teve1.info
“Nënkryetari i Komunës së Malishevës, Vesel Krasniqi dhe drejtori për shëndetësi, Hajdin Berisha, në orët e mbrëmjes i kanë vizituar pacientët e helmuar nga Malisheva, të cilët po trajtohen në spitalin e Prizrenit. Sipas mjekut përgjegjës në Klinikën Infektive, Dr. Beram Karanezi, gjendja e pacientëve nga Malisheva, është stabile. Sipas të dhënave, aktualisht janë duke u trajtuar 41 pacient nga Malisheva. Nënkryetari Krasniqi dhe drejtori Berisha, i kanë falënderuar mjekët dhe personelin e spitalit për gjithçka kanë bërë për trajtimin e pacientëve nga Malisheva dhe më pas i kanë vizituar pacientët e shtrirë në klinikat e këtij spitali”, thuhet në njoftim.
Siç ka raportuar kjo komunë orë më parë, numri i të helmuarve ka arritur në 158.
Lidhur me rastin, pronari i lokalit K.SH. është dërguar në mbajtje, teksa Prokuroria Themelore në Gjakovë ka kërkuar caktimin e masës së paraburgimit nën dyshimin se i njëjti ka kryer veprën penale “Prodhimi dhe vënia në qarkullim e artikujve të dëmshëm ushqimorë”. /Teve1.info/
