Mëngjesin e së mërkurës, Mali i Zi ndërpreu mësimin në 41 shkolla në të gjithë vendin.
Kjo pasi, në disa emaila zyrtarë, erdhën mesazhe kërcënuese nga një person i panjohur.
Sipas raportimeve të medieve malazeze, në emailat e dërguar ka alarm për bomba të vendosura në shkolla dhe institucionet tjera.
Pas këtij raportimi, ka reaguar presidenti malazez, Milo Gjukanoviq duke kërkuar veprime urgjente për ndriçimin e kësaj situate.
“U bëj thirrje organeve kompetente shtetërore që të reagojnë urgjentisht për raportimet e fundit për vendosjen e mjeteve shpërthyese në institucionet arsimore dhe të tjera. Siguria e fëmijëve, si kategoritë më të cenueshme të shoqërisë, dhe të të gjithë qytetarëve, duhet të jetë prioritet absolut i shtetit dhe i çdo individi”, tha Gjukanoviq.
Njohësi i çështjeve politike nga Mali Zi, Kristjan Dukaj tha për Tëvë1 se emailat ishin me përmbajtje kërcënuese.
Sipas tij, në këtë fazë është vështirë të dihet motivi.
Në anën tjetër, gazetari shqiptar atje, Mustafa Canka, thotë se këto sulme ishin të rreme dhe të njëjtat nuk paraqesin problem për sigurinë në vend.
Alarme për sulme me bomba ka pasur edhe gjatë muajit të kaluar në Mal të Zi.
Sipas medieve atje, rasti i parë ka qenë më 27 mars.
Raporti i gazetares Fetije Kamberi.
