Zjarrfikësit e Kosovës kanë mbajtur sot një protestë para Qeverisë pas mospërfshirjes në shtesat për rrezikshmëri. Por, kryetari i Sindikatës së Zjarrfikësve, Muharrem Beka thotë se vendi i tyre nuk është në protesta.
Beka thekson se zjarrfikësit janë shumë të indinjuar dhe protesta ka ardhur si rezultat i shumë përpjekjeve të bëra më parë, në mënyrë që kërkesat e tyre të dëgjohen nga Qeveria.
“Aspak nuk jemi kanë të interesuar që kjo të ndodhë, sepse zjarrfikësit nuk e kanë vendin në protesta, por në misionin e shenjtë të shpëtimit të jetës dhe të mirave materiale të këtij vendi…deri kur zjarrfikësit e Kosovës duhet të presin që t’i gëzojnë të drejtat që i takojnë edhe me ligje dhe janë obligim i institucioneve tona?”, deklaroi ai në “Ditari” në Tëvë 1.
Beka bëri të ditur se pas mbajtjes së protestës, kanë zhvilluar një takim me disa zyrtarë, me të cilët siç potencoi ai, u dakorduan që brenda një jave të marrin një përgjigje lidhur me kërkesat e parashtruara.
“Na kanë pranuar në takim këshilltarja e zyrës së kryeministrit, zëvendësministri i Punëve të Brendshme dhe sekretari. Kemi pasë një takim të gjatë, kemi diskutuar për të gjitha kërkesat dhe jemi dakorduar që brenda një jave të marrim një përgjigje nga institucionet lidhur me kërkesat që i kemi parashtruar. Shprehën një gatishmëri”, shtoi ai. /Teve1.info/
