Më tej, ajo theksoi se pjesa e parë e investimeve do përfshijë 6 vendet e Ballkanit Perëndimor.
“Ne duhet t’i sinkronizojmë hapat tanë sa i përket krizës energjetike. Kam kënaqësinë të shpallë që komisioni do të prezantojë një pako të madhe të zhvillimit të tillë, kemi diku 1 miliardë euro në grante për Ballkanin Perëndimor në dy pjesë. Pjesa e parë është 500 milionë euro në grante si mbështetje financiare imediate për 6 vendet e Ballkanit Perëndimor. Ndërsa 500 milionë tjera do t’i dedikohet investimeve në infrastrukturë, por është shumë me rëndësi investimi te energjia e ripërtërishme”, deklaroi Von der Leyen gjatë konferencës.
Ndërkaq, lidhur me zhvillimet e Procesit të Berlinit, Von der Leyen tha se në procesin e integrimit kanë bërë progres mjaftë të mirë.
Teksa, shtoi se qëllimi kryesor i këtij procesi është thellimi i integrimit ekonomik, raporton teve1.info.
“Ishte një takim tejet i bukur sot me Shqipërinë që është në timon për vitin e ardhshëm. E di që Procesi i Berlinit do vazhdojë të jetë në duar të mira. Pra, qëllimi ynë është që të vazhdojmë ta përforcojmë lidhjen tonë dhe këtu kemi dy drejtime, dy shtigje, e që njëri prej tyre është procesi i integrimit, aty kemi bërë progres të mirë. Kemi siguruar marrëveshjet për një metodologji të re të zgjerimit të Bashkimit Evropian e që ka hapur shtigje jo vetëm për hartimin e vendimeve që janë shumë të rëndësishme, por edhe që ka kthyer kridibilitetin për gjithë procesin”, tha tutje ajo.
Gjithashtu, bëri të ditur se tanimë kanë thurur edhe një plan shumë ambicioz të investimeve, pra diku 30 miliardë euro në rajon që në tërësi i bie 1/3 bruto e produktit vendor.
“Këtë vit kemi kënaqësinë që të kemi konferencën e parë ndërqeveritare me Shqipërinë dhe Maqedoninë e Veriut”, u shpreh ajo më tej.
Kujtojmë se në Samitin e Berlinit me vendet e Ballkanit Perëndimor sot janë nënshkruar tri marrëveshje.
Njëra ndër to është edhe marrëveshje për lëvizje të lirë me letërnjoftime./Tëvë1.info.
