Të shtunën, më 11.02.2023 Shoqata e Afaristëve të Podujevës mbajti Kuvendin e Parë të Punës, në të cilin morën pjesë mbi 100 përfaqësues të bizneseve si dhe përfaqësues të Kuvendit Komunal të Podujevës, të shoqërisë civile si dhe ata të KFOR-it.
Hapjen e Kuvendit e bëri Kryetari i Shoqatës së Afaristëve të Podujevës, Bashkim Osmani, i cili ftoi të gjithë afaristët llapjanë që t’i bashkohen Shoqatës dhe të angazhohen për realizimin e interesave të përbashkëta që njëkohësisht do të ndikojnë pozitivisht në fuqizimin e ekonomisë së Llapit dhe Gollakut.
“Ne si biznese po mundohemi të japim shembuj të mirë me ide kreative dhe inovative, për të ruajtur fuqinë punëtore dhe për te ndaluar migrimin e të rinjve tanë drejt vendeve perëndimore, duke pasur parasysh që shumë prej tyre mezi po e presin liberalizimin e vizave për të ikur nga Kosova”, tha Osmani, thuhet në komunikatën e shoqatës.
Ai tha se themelimi i kësaj Shoqate ishte i nevojshëm pasi, sipas tij mungonte koordinimi i bizneseve të Llapit për të avokuar apo lobuar në qeverisjen lokale dhe atë qendrore nuk ekzistonte.
Ndër sukseset që ka pasur Shoqata e Afaristëve të Llapit, Osmani përmendi tryezën e organizuar mes deputetëve Kuvendit të Republikës së Kosovës nga Llapi e Gollaku dhe përfaqësuesve të bizneseve anëtare të shoqatës.
Ndër temat e diskutuara ishte edhe mosvazhdimi i licencës së Terminalit Doganor në Podujevë, dhe sipas premtimeve të marrë në atë takim, pas presionit të ushtruar nga deputetët prezent rihapja edhe ndodhi.
Osmani tha se shoqata ka nënshkruar disa memorandume bashkëpunimi me organizata të ndryshme dhe ka lidhur bashkëpunim të ngushtë edhe me bizneset e diasporës.
Kuvendin e punës së shoqatës e përshëndetën edhe përfaqësuesit e komunës, të Shoqërisë Civile, si dhe mysafirë tjerë prezent.
Drejtoresha e Shoqatës, Arta Mehana, paraqiti të arriturat e Shoqatës si dhe planet për vitin 2023, duke theksuar se ndër prioritetet kyçe të shoqatës është rritja e zhvillimit ekonomik të Podujevës përmes rritjes së kapaciteteve dhe performancës së bizneseve.
Me shtimin e 2 anëtarëve të rinjë të Bordit, Shoqata synon të përfshijë edhe aspektin gjinor në të gjitha aktivitetet dhe iniciativat e saj në të ardhmen./teve1.info/
