Ishte 28 shkurti i ’98-tës, kur forcat serbe nisën për herë të parë sulmin në Kosovë.
E ndër vendet e para që ranë pre ishte edhe Drenasi.
Atje, në fshatrat Likoshan e Qirez, 26 civilë shqiptarë u ekzekutuan.
E këtë të shtunë, në 28-vjetorin e kësaj masakre të parë në Kosovë, në nder të dëshmorëve u bënë homazhe në Likoshan.
I pranishëm aty ishte edhe kryeministri Albin Kurti.
Kreu i Ekzekutivit tha se gjaku i martirëve është te themeli i shtetit.
“Pikërisht në kohën e kësaj masakre, më 28 shkurt të vitit 1998, kur për 28 orë rresht, artileria dhe forcat e armike të Serbisë sulmuan popullsinë këtu, u bë një ndërgjegjësim i madh i popullit jo vetëm në Kosovë, por anë e mbanë trojeve që shqiptarët i popullojnë në Ballkan, edhe të mërgatës sonë, e që filloi edhe një vetëdijësim gjithnjë më i madh edhe i këtyre kancelarive diplomatike botërore, po njëkohësisht edhe i opinionit publik ndërkombëtar”, u shpreh Kurti.
28 shkurtin e 1998 e kujton mirë kryetari i OVL-UÇK-së, Hysni Gucati.
“Të gjithë këtyre dëshmorëve u kemi borxh jo vetëm sot me i vizitu, po për ditë me ardh te këto varre me i vizitu është pak, jo një herë në vit që po vijmë. Është rrezik nëse ne i harrojmë këto, mund të na përsëritet historia” , tha Gucati.
Disa fjalë për këtë masakër i pati edhe kryetari i Drenasit, Ramiz Lladrovci.
“Kjo është një nga masakrat e para të cilat akoma nuk janë dënuar ata që e kanë bërë këtë masakër dhe kjo ka treguar që kjo masakër dhe masakrat e tjera e kanë ngrit botën demokratike që është bërë aleat me neve”, u shpreh Lladrovci.
Kujtime të asaj dite ka edhe kryetari i Skenderajt, Sami Lushtaku.
“Ka qenë një ditë e tmerrshme për mua dhe për shumë bashkëkombës të mi, një ditë tepër e errët, por që ditën që ka ndodhë masakra këtu, mendoj që ka fillu edhe vetëdijësimi i qytetarëve, po besoj që e kanë kuptuar që me Serbinë më nuk ka as jetesë, po as bashkëjetesë”, tha Lushtaku.
Sulmi ndaj Likoshanit dhe Qirezit u pasua nga sulmi në Prekaz në ditët në vijim, që më pastaj shënuan edhe fillimin e luftës në Kosovë.
