Ndryshimet që prej kohësh i ka paralajmëruar presidenti amerikan Joe Biden brenda administratës së tij. E këto ndryshime, besohet se do të kenë një ndikim edhe në rajonin e Ballkanit.
Kreu i shtëpisë së bardhë, e ka nominuar James C. O’Brien, për Ndihmës Sekretar të Shtetit për Çështjet Evropiane dhe Euroaziatike.
Ky nominim, sipas njohësit të çështjeve politike, Melazim Koci, mund të ndikojë që Bashkimi Evropian të jetë më neutral në dialogun Kosovë – Serbi
“Unë jam shumë i bindur, besoj që angazhimi i James O’Brien do t’i jap një kahje pozitive dialogut Kosovë – Serbi, sepse me vet faktin që një personalitet i tillë vije në atë pozicion, unë mendoj që do të bëjë presion te Bashkimi Evropian që ata të bëjnë ndryshime të caktuara në raport me Kosovën dhe Serbinë, në kuptimin e baraspeshimit të presionit te te dyja palët është evidente që presioni është i njëanshëm”, ka thënë Koci.
Ndërsa, profesori universitar Dritëro Arifi, thotë se ndryshimet brenda administratës amerikane mund të kenë impakt edhe në politikën e jashtme të BE-së.
“Po besoj që ky riformatizim në State Departament mund të ketë impakt edhe në BE që, BE-ja të flet njëzëri kur flet për Kosovën, kur flet për Ballkanin, që të mos ketë nënkuptime në politikën e jashtme të BE-së. Kjo po vërehet që edhe BE-ja e ka kuptuar pra dobësitë e veta dhe mangësitë që ka në politikën e jashtme dhe kjo mund të jetë një shtysë e fuqishme që edhe Bashkimi Evropian të themi të reformatizohet në politikën e jashtme”, vlerëson Arifi.
Për Kosovën, mbetet me rëndësi të shihet se çfarë ndikimi do të kenë këto ndryshime sa i përket dialogut me Serbinë të ndërmjetësuar nga Bashkimi Evropian, por ku roli amerikan shihet me një rëndësi të veçantë.
