Qe 55 vjet jeton në Gjermani.
Por gjatë së hënës, Ramadan Hashani me familje u kthye në vendlindjen e tij.
Kjo pasi që i biri, Arsim Hashani zgjodhi që në fshatin Vërbicë të Kmetocit në Komunën e Gjilant të ndërtojë një fabrikë për prodhim të dyerve e dritareve.
Nën emocione që s’ia fshehin dot sytë, babai tregon lumturinë që ndjen për të birin.
“Ishalla Zoti ua len krejtve edhe mue, veç shumë ka vytë, pa hesap kanë vytë edhe tre që i kam atje, po Arsimi shumë mirë është t’u shku, ishalla i nimon Zoti. Krejt ky popull që është qitu, e edhe tri herë qekaq ishalla prej ktij veni hanë”, thotë Ramadan Hashani, babai i pronarit të fabrikës.
Edhe vëllai i tij binjak ndihet i gëzuar për hapjen e kësaj fabrike.
Krenarinë për hapjen e fabrikës e tregon edhe e ëma, Hajrije Hashani.
“Si nana e Arsimit jam krenare që i kam rritë këta fëmijë e janë në udhë t’Zotit, Allahy ua dhashtë ndihmën e shnetën gjithë popullit shqiptar”, shprehet ajo.
E gëzimin me ta e ndan edhe Osman Ostergllava, i cili gjatë kohës së luftës e kishte strehuar këtë familje.
“Sot na pruni Zoti me ardhë këtu, me këta nuk ndahemi as dasëm e dekë, për këtë katun, ishalla e bën Zoti Stamboll”, thotw ai.
Megjithatë, për vënien e gurëthemelit të fabrikës për dyer e dritare, në Vërbicë të Kmetocit erdhi kryeministri Albin Kurti bashkë me kryetarin e komunës së Gjilanit, Alban Hysenin.
Ndërsa ëndrra e Arsimit për të investuar në vendlindje ishte tash e 22 vite më parë.
“Kur ika 14 vjet, çdo ditë t’u punu atje kam mendu qysh me u kthy. Po tash edhe t’u e pa përkrahjen….po tregon edhe prezenca juaj sot këtu”, tha ai.
Investimin e tillë nga mërgimtari e lavdëroi kryeministri, Albin Kurti.
“Natyrisht që e ka mbështetjen tonë sepse ekonomia e vendit sa më shumë që zhvillohet aq më i lartë është punësimi…Investimet e tilla na rrisin shpresën dhe shtojnë zellin për punë të mira e të mbara edhe në të ardhmen”, tha Kurti.
Kurti, madje përktheu edhe emrin e kompanisë për të pranishmit.
Së bashku ia vunë gurëthemelin fabrikës, e nuk munguan edhe shakatë nga kryeministri.
Ndërsa pas vënies së gurëthemelit, u recituan edhe poezi.
Për fund, kryeministri Kurti bëri thirrje për investime të mërgatës në Kosovë.
Kjo fabrikë do të eksportojë dyer e dritare në Gjermani, derisa investitori ka planifikuar 10 milionë investim deri në përfundimin e ndërtimit të fabrikës.
E vënia e gurëthemelit të saj, në shoqëri të tupanëve u festua me valle nga familjarët.
