Kryeministri Albin Kurti në hapje të mbledhjes së Qeverisë ka folur për nënshkrimin e vendimit për liberalizimin e vizave dhe për votimin pro pranimit të aplikimit të Kosovës në Këshillin e Evropës nga Komiteti i Ministrave.
Sa i përket liberalizimit të vizave, Kurti tha se meritat për zhbllokimin e procesit i takojnë qeverisë së tij teksa shtoi se pasaporta e Kosovës tanimë do të jetë më e fuqishme.
“Javën që lamë pas, edhe këtë javë çdo qytetar i Republikës është ndjerë më evropian dhe më afër Evropës. Liberalizimi i vizave kishte ngecur për 4 vjet në agjendën e Këshillit të BE-së. Me shumë punë e angazhim sidomos në raport me vendet hezituese, vitin e kaluar arritëm që gjatë presidencës çeke të zhbllokojmë këtë proces. Më 18 prill Parlamenti Evorpian kaloi vendimin e liberalizimit të vizave, për ta nënshkruar pastaj më 19 prill…Nga 1 janari qytetarët tanë më në fund do të mund të udhëtojnë pa viza në 32 vende të tjera e të reja evropiane përfshirë këtu edhe Bullgarinë, Rumaninë e Qipron që nuk janë pjesë e zonën Schengen. Pasaporta jonë do të jetë më e fuqishme ashtu siç shteti jonë po bëhet përherë e më i fortë”, deklaroi Kurti.
Ndërsa sa i përket votimit pro pranimit të aplikimit të Kosovës në Këshillin e Evropës nga Komiteti i Ministrave, tha se është si rezultat i të arriturave në demokraci, sundim të ligjit e të drejtat e njeriut
“Ndërkaq këtë javë u mor një vendim tjetër i rëndësishëm, po në Strasburg. Më 24 prill Komiteti i Ministrave me mbi 2/3 e votave të nevojshme votoi për pranimin e aplikimit të Kosovës për anëtarësim. Ne besojmë thellësisht se si shtet i ri, demokratik dhe paqedashës do të japim kontributin e çmueshëm në të ardhmen si anëtar me të drejta të plotë në Këshillin e Evropës. Dhe natyrisht që rezultatet gjithnjë e më të mira sa i përket tri vlerave fundamentale të Këshillit të Evropës: demokracisë, sundimit të ligjit dhe të drejtave të njeriut kanë ndikuar shumë në këtë arritje të madhe”, deklaroi Kurti.
“Këto dy vendime të rëndësishme konfirmojnë rrugën tonë evropiane, konfirmojnë që jemi në rrugën e duhur dhe që Kosova i përket Evropës si union, si vlerë”, shtoi i pari i ekzekutivit.
