Ka më shumë se tre muaj që janë detyruar të largohen nga shtëpia e tyre.
Kjo pasi shtëpia e cila gjendet në Lagjen e Spitalit në Prishtinë është plasaritur nga ndërtimet që po bëhen këtu.
Familja Përvetica është detyruar të largohet nga vendi ku banuan për më shumë se 40 vjet.
Por të mërkurën kjo familje vendosi të kthehet në shtëpinë e tyre.
“Na në shpi kur jemi kanë kemi paguar vetëm 40 deri në 50 euro, pasi jemi nxe me dru, kemi dëshmi edhe drutë, që kemi ble për të kaluar dimrin, ndërsa në banesë atje, duhet mu nxe me rrymë, e rryma këtë muaj na ka ardhë, 170 euro diçka është e madhe dhe ne nuk mundem më pagu”.
Plasaritjet e murit shihen në çdo cep të shtëpisë.
Tavanet janë çarë nga shembja e dheut.
Por këto nuk janë shembjet e vetme që janë shkaktuar.
Që kjo shtëpi nuk është e banueshëm, anëtarja e kësaj familje, Arjeta Përvetica, thotë se kanë marrë edhe vendimin nga Komuna e Prishtinës.
“Kanë qenë edhe shiritat me nuk janë, se shtëpia është e pabanueshme, edhe procesi verbali e cekë që shtëpia është e pabanueshme, por unë nuk kam zgjidhje, se nuk kam ku me shku përtej shtëpisë sonë”, thotë ajo.
Përvetica ka treguar kushtet në cilat jetojnë dhe përgjigja që kanë marrë nga pronari i kompanisë EBB GROUP.
“Prej 9 shtatorit e deri më sot ne jemi duke banuar në një shtëpi në rrugën C të cilën na ka paguar vetë investitori, probleme që kemi tani është se kerkush nuk ka ndërmarrë asgjë. Shtëpia nuk është sanuar, ata kanë filluar dhe kanë bo garazhdën poshtë, unë sot e kam thirr pronarin e kompanisë edhe pronari i kompanisë me tha që nuk kam asnjë përgjegjësi dhe problemi që keni ju ja ka bo veç komuna”, ka thënë ajo.
E punimet madje tash e disa ditë janë ndërprerë nga Drejtoria e Inspekcionit për të disatën herë.
Për këtë kjo familje kërkon që të ju bëhet një zgjidhje.
“Kërkesa jonë është nëse shtëpia nuk është më e banueshme, thjeshtë dua që më mu kompenzu kjo shtëpi, du me pas një vendbanim të ardhmen, mos pas çdo herë mendjen që jam me qira dhe një ditë nuk ma paguan pronari, se nuk kam mundësi pagu vetë”, thotë përfaqësuesja e familjes.
Tëvë 1, ka provuar të marrë një përgjigje nga pronari i kompanisë ndërtuese, në lidhje më situatën por edhe nga komuna e Prishtinës, por deri në momentin e transmetimin të stories nuk ka marrë përgjigje.
