Novosella për Tëvë1, përmendi edhe Fazli Grajçevcin e Shaban Shalën, po ashtu ish-të burgosur politik, mirëpo të vrarë brenda këtij burgu.
‘Shndërrimi i këtij burgu në muze, për mua dhe shokët e mi të cilët kemi kaluar në këto burgje, do të thoja që edhe për Kosovën është lajm i mirë. Një fjalë e urtë popullore thotë “mbyllja e një burgu, çelja e një shkolle”. Nëse në këtë burg dikur torturoheshin deri në vrasje, siç janë: Fazli Grajçevci, Shaban Shala e shumë të tjerë, e sot të shndërrohet në monument të kulturës, është lajm i mirë”, tha ai në emisionin “Ditari”.
Sipas tij, ky burg do mbetet dëshmi për ta kujtuar se rruga e lirisë së Kosovës, ishte e vështirë e me shumë sakrifica.
“Unë këtu kam qenë i burgosur kur kam qenë i mitur, në vitin 1964, 17 vjeçar. Pastaj në vitin 1968, kam qenë njëri nga organizatorët e demonstratave të atij viti me shumë shokë, ku u dënova edhe 5 vite tjera. Sigurisht që kthimi në këtë burg më sjellë emocione të forta. Ky burg, është një burg i tmerrit dhe i ferrit. Ky burg do mbetet si dëshmi se rruga e lirisë së Kosovës ishte e vështire, e mundimshme, e rrezikshme si dhe me shumë sakrifica”, deklaroi Novosella.
Sot pasdite u zhvillua ceremonia e hapjes së Muzeut të Burgut të Prishtinës.
Sipas njoftimit të MKRS-së, në kuadër të ceremonisë së muzeut do të hapet ekspozita e përkohshme “Burgu i Idealit” e cila do të mbahet në ambientet e ish-ndërtesës së Qendrës së Paraburgimit në Prishtinë, në rrugën “Luan Haradinaj”.
