Deputeti i Partisë Demokratike të Kosovës, Hisen Berisha i ka cilësuar si propagandë deklarimet e qeveritarëve për një sulm tjetër të mundshëm terrorist sikur ai i Banjskës dhe mundësinë e një konflikti të ri me Serbinë.
Berisha në emisionin “Ditari” në Tëvë1, tha se deklarime të tilla nga qeveritarët mund të kenë pasoja negative edhe për investime të huaja në Kosovë.
“Derisa këtu prodhohen vazhdimisht lajme për pasiguri dhe mundësi të një lufte siç po bëjnë dy zv.kryeministrat dhe ministrat përkatës, atëherë Kosova si burim i lajmeve të pasigurisë nuk është vend dhe ambient për investime të huaja. Që do të thotë, po ta shohësh në vlerësim objektiv pa opozitarizëm, pa politikë, duhet me kriju dyshimin a thu këta njerëz kanë agjendë për ta dëmtuar deri në këtë shkallë Kosovën”, tha deputeti i PDK-së në Tëvë1.
Madje ai ironizoi duke pyetur se a duhet t’i besojmë “propagandës” së Qeverisë, apo përfaqësuesve evropianë e NATO-s të cilët të cilët garantojnë siguri dhe mbështetje për Kosovën.
Por që kjo sipas Berishës, pritet nga një Qeveri që siç tha ai, ka ardhur në pushtet pikërisht përmes propagandës dhe kauzave të rrejshme.
“Në qoftë se mashtron ambasadori amerikan, përfaqësuesi amerikan, sekretari i NATO-s, përfaqësues evropianë që komunikojnë me Kosovën që e mbështesin procesin politik në Kosovë, se vërtetë Kosova si na tha ambasadori tha “fleni pa qorapa” … Pra tash kujt duhet t’i besojmë propagandës dhe linçimeve të një Qeverie që u tregu e pa suksesshme dhe Qeveri që erdhi përmes një propagande denigruese ndaj çdo arritje në vendin e vet, që erdhi përmes kauzave të rrejshme që asnjërën nuk e bëri realitet”, shtoi Berisha.
Ndryshe, ministrja e Punëve të Jashtme dhe Diasporës (MPJD), Donika Gërvalla-Schwarz, ka deklaruar se ideja e shkëmbimit të territoreve apo ri përcaktimit të kufijve mund të çojë në një luftë të re në Ballkanin Perëndimor.
Sipas saj, një ide e tillë është e rrezikshme.
“Ky plan nuk zgjidh probleme, por krijon të reja për të gjithë rajonin. Precedenti i ndryshimit të kufirit në Ballkan mund të jetë shumë i rrezikshëm dhe mund të nisë një luftë të re,” tha ajo për platformën ukrainase të lajmeve “European Pravda”.
Derisa, zëvendëskryeministri i Kosovës, Besnik Bislimi, tha se shteti duhet të jetë gati për luftë, pasi shtoi se një sulm hibrid nga Serbia gjithmonë mund të fillohet.
Bislimi ka thënë se një luftë konvencionale është e pamundur tani, pasi jemi të mbrojtur nga paqeruajtësit e KFOR-it.
“Ne duhet të jemi gati për luftë. Po, një luftë konvencionale është e pamundur tani, pasi ne jemi të mbrojtur nga paqeruajtësit e KFOR-it. Megjithatë, siç ka treguar shembulli i Banjskës, një sulm hibrid gjithmonë mund të fillohet kundër nesh – dhe ne duhet të përgatituni që kjo të ndodhë përsëri në çdo kohë”, ka deklaruar Bislimi, për platformën ukrainase të lajmeve European Pravda..
