“Jam në spital, por shpresoj të shërohem shpejt”.
Është kjo një nga letrat që shkroi gjersa ishte duke u trajtuar në spital.
Trajtimin aty, veprimtari Fadil Vata gjatë vitit ’89, po e merrte pas maltretimeve e torturave që kishte pësuar nga ushtarët serbë.
Letrën ai e shkroi gjatë kohës kur po trajtohej në Zvicër, gjersa ishte dërguar atje pasi gjendja e tij shëndetësore ishtë rënduar shumë.
Për pasojë, më 25 prill të vitit 1990, zemra e tij pushoi së rrahuri në mërgim.
Këtë të shtunë, 36 vite pas vdekjes së tij, vëllau i tij, Rama, tregoi për tëvë1 gjithë rrugëtimin e Fadilit.
“Operimin e parë e ka pasë në burgun qendror në Beograd…letra është kur e sqaron që është në spital, është në dhjetor të 1989-tës, thotë para katër javësh jam shtu në spital dhe atje menjëherë i u kanë nënshtru operacionit sepse gjendja ka qenë e rëndë. Dhe aty përveç sqarimit që gjendet në Zvicër dhe nuk kemi çka me u merakos për këtë, ai shkruan që është optimist që shpejtë do të shëndoshem edhe do të dalë”.
Miqtë më të mirë të Fadilit ishin heronjtë Fahri Fazliu e Afrim Zhitia.
Në atë letër, ai kishte lënë dhe një porosi tjetër.
“E porosit nanën edhe babën me shku në Lluga. Domethënë me i pa të Afrimit, me i pa të Fariut…baci ka dalë dy-tri javë ndoshta para vrasjes tyre dhe ajo e ka nifarë mënyre e ka trondit shumë, i ka shkaktu dhimbje të madhe”, tha vëllau i Fadil Vatës, Rama.
Mbi gjithë sfidat që kishte, dashuria e tij për librat e bëri Fadilin një lexues palodhur.
“Ai i ka lon diku rreth 2000-2500 libra sa ka qenë nxënës i shkollës së mesme para se me hy n’burg, që i ka ble me nifar burse si nxënës i shkëlqyeshëm. Madje unë, unë e kam rrit atë numër dhe tash diku janë nji fond i librave diku rreth 4000 që baci i ka”.
Fadil Vata është njëri nga veprimtarët dhe udhëheqësit më të devotshëm të Lëvizjes kombëtare shqiptare të viteve ‘80-ta.
Për bindjet e tij, më 3 maj të 1981, u burgos në kazermën e Pozharevcit në Beograd, ku ishte dënuar me 6 vjet burgim.
Më 25 prill 2013, Vata u dekretua me titullin “Hero i Kombit”.
