Paraditen e së hënës hetuesit policorë zbarkuan në Prokurorinë Themelore në Prizren.
Aty prangosën prokurorin Beqë Shala që ushtronte funksionin në Departamentin e Përgjithshëm.
Në aksionin e Prokurorisë Speciale, Shala u arrestua nën dyshimin për marrje ryshfeti dhe keqpërdorim të autoritetit zyrtar.
Kjo e fundit nuk dha detaje shtesë rreth aksionit, veçse pasdite ka treguar që Shala është ndaluar për 48 orë.
“Me urdhër të Prokurorisë Speciale të Republikës së Kosovës, hetuesit policorë nga Drejtoria për Hetimin e Krimit të Organizuar dhe Krimeve të Rënda në Policinë e Kosovës, në bashkëpunim me Kryeprokurorin e Prokurorisë Themelore në Prizren kanë arrestuar B.Sh nën dyshimin se ka kryer veprën penale “Marrja e ryshfetit”. I dyshuari B.Sh., prokuror në Prokurorinë Themelore të Prizrenit, është arrestuar në vendin e punës”, thuhet në njoftimin e PSRK-së
Policia bastisi edhe shtëpinë e të dyshuarit ku ka sekuestruar edhe disa prova materiale.
Tëvë1 ka tentuar të marrë një qëndrim edhe nga kryeprokurori i Prizrenit, Petrit Kryeziu por që i njëjti nuk ka pranuar të flas.
Gjatë ditës “Betimi për Drejtësi” ka publikuar edhe një audioncizim ku pretendohet se ka qenë subjekt hetimi prokurori.
Aty thuhet se dëgjohet prokurori Shala duke marrë ryshfet Shala nga një avokate, që dyshohet se është Drenusha Berisha.
Takimi është zhvilluar më 25 gusht të vitit 2022 në veturën e Shalës.
Në këtë audioincizim, sipas “Betimit për Drejtësi” dëgjohet avokatja Berisha teksa numëron paratë, dhe nga shuma prej 700 euro, gjysmën e tyre ia jep prokurorit Shala për të mos paraqitur kërkesë për caktim të masës së paraburgimit, pas ndalimit të klientit të saj për 48 orë.
Prokurori Shala: Qe ia lëshova vendimin atij, të lirohet meniherë.
Avokatja Berisha: Po se më thirrën familjarët më tha u kry, se e kishin marrë atë djalin në sabah, se unë kur të thirra qatëherë, se kur të shkrujta faktikisht veç sa shkova në punë. Tani e kishin marrë, kenë masdite. Prokuror unë nuk e dita që qeshtu, po të kallxoj realisht unë ja mora atyne dje qysh u mora vesh veç 700 jau kom marrë. Qe ku i kam paret, m’i kanë pru sot. Se a e din qysh ke puna, nuk është që më ka ndodh najherë, qeshtu hera e parë dhe nuk…
Prokurori Shala: Këqyre une..
Avokatja Berisha: Jo unë qe ku i kam 700.
Prokurori Shala: Njerëzit bajnë.
Mediumi ka tentuar të marrë një përgjigje nga ajo, por që ka qenë e paqasshme.
