Besa – Besë, jehoi edhe një herë në “Verrat e Llukës”
E nuk munguan, as tingujt e muzikës folklorike.
Në këtë formë, “Verra e Llukës” në Deçan, mirëpriti edhe një herë dhjetëra kosovarë.
Por, një numër shumë më i madh, u mblodhën këtu plot 35 vjet më parë.
Efekt – të qoftë falë gjaku…
Rreth gjysmë milioni shqiptarë në krye me Anton Çettën, erdhën këtu me 1 maj të vitit 1990, me vetëm një qëllim.
Kjo për t’ia falur njërit tjetrit gjaqet e ngatërresat.
Havë Shala, protagoniste e kësaj ngjarje në të cilën u falën mbi 100 gjaqe, tregon se si nisi gjithçka.
“Lindja e idesë së pajtimit të gjaqeve nuk ishte një rastësi, ne jetonim në një kohë ku çdo e drejt e jona cenohej, rrezikohej edhe ekzistenca jonë si popull, ku regjimi serb mohonte historinë tonë, pengonte të tashmen tonë dhe ndalonte të ardhmen tonë. Në këtë kohë filluan protestat e jashtëzakonshme madhështore si për nga pjesëmarrja, ashtu edhe për nga guximi. Njerëzit nuk e kishin frikë vdekjen. Ata nuk i frikësuan as vrasjet dhe plagosjet e shumta të fund janarit 1990. Regjimi (serb) filloi t’i ketë frikë këtij populli të pa frikësuar”, tha Havë Shala – protagoniste e ngjarjes.
Kjo ngjarje madhështore, nuk i shkoqet nga mendja as ish-luftëtarit të UÇK-së, Nasim Haradinajt.
Përveç rëndësisë, ky tregon se sa i rrezikshëm ishte një organizim i tillë.
“Ju e dini, zonat e kufirit gjithmonë kanë pasur fatkeqësisht dy sende, mesatare nuk ka pasur, ka pasur ose të fortë ose të ligë. Një pjesë përpos që ishin të burgosur politikë, ishim edhe të përndjekur, kishim fletarrestime në atë kohë”, tha Haradinaj.
Falënderim të veçantë për organizatorët e kësaj ngjarje të 1 majit të vitit 1990, pati i pari i Deçanit, Bashkim Ramosaj.
“Më lejoni t’i falënderoj familjet, të cilat kanë qenë protagoniste të kësaj dite, sepse është shumë e rëndësishme, e cila ka kulmuar me bashkimin e popullit tonë për nevojat e lëvizjes kombëtare e deri te lufta e Ushtrisë Çlirimtare të Kosovës”, tha ai.
Në përvjetorin e kësaj ngjarje historike, nuk u panë krerët e shtetit.
