Është 31 dhjetori i vitit 1998.
Bota po e feston, edhe një ndërrim të motmoteve.
Por në Kosovë, një komandant brigade, mori rrugën drejt fshatit Bajë Të Malishevës.
Kjo për të parë nga afër, moralin e ushtarëve të Brigadës 121 “Ismet Jashari”
Secili nga këta ushtarë, kishte zgjedhur që natën e Vitit të Ri, ta kalonte në frontet e luftës.
Më të arritur komandanti, pritet ashtu siç e do rendi ushtarak.
Këtë raportim atë natë e dha udhëheqësi i njësitit, Çerkin Dukolli.
“Ishim në togun e Banjës, dal e raportoj për gjendjen e njësitit që ishte aty, për komplet situatën, gjendjen e ushtarëve, moralin e tyre, pjesët logjistike, pjesën e popullatës dhe raportim tjetër që i jepet komandantit”, tha ai për Tëvë1.
Ishte ky Viti i Ri i parë, që Kosovën po e gjente në gjendje lufte.
Kjo bëri që shumë ushtarë, ta kalonin festën larg familjarëve.
“Vitet ’98-’99, ishin momenti i së vërtetës, ishte kënaqësi e jashtëzakonshme, edhe pse i vetëm, vëllezërit e tjerë ishin në pozicionet e tjera, por vëlla, motër, familje, gjithçka tjetër e ki shokun në istikame, më të cilin e ndanë të mirën e të keqën. Edhe sot e kësaj dite e përshëndes secilin ushtarë dhe faleminderit për ato momente që na i kanë dhurua atë natë”, tregon ish – komandanti i UÇK-së, Dukolli.
Përjetimet e asaj nate me Tëvë1, i ka ndarë edhe vet komandanti i brigadës, Fatmir Limaj.
“Çeliku” thotë se këta ushtarë, ishte e vështirë të thyheshin.
“Po e kalonim në vitin tjetër me mungesën e shumë shokëve që e kishim filluar luftën bashkë, me shumë plagë e dhimbje, por edhe me bilancet e fitoreve që i kishim arritur. Atë 31 dhjetor të gjithë ishim të bindur që Kosova kurrë më nuk ka më qenë siç ka qenë përpara, kishim arritur fitore të jashtëzakonshme”, shpreh ai.
Atë natë, Limaj e dhjetëshi i UÇK-së, Rexhep Selimi, u prononcuan edhe për media.
Pavarësisht luftës çlirimtare, të dy këta, e gjetën vetën si të akuzuar nga Gjykatat në Hagë për krime lufte.
Për këtë, një Vit i Ri në Kosovë, pa shokun e luftës, është i rëndë edhe për “Çelikun”.
“Shumë e rëndë, unë e kam përjetuar ndërrimin e moteve në Hagë, e di si është. Me Rexhën i kemi inspektuar të gjitha trupat në vija të fronteve dhe familjet e dëshmorëve. Kemi evokuar kujtime me bashkëluftëtarët, kemi dhënë porosi për familjarët, ishin momente të jashtëzakonshme”, thotë Limaj.
Nga këtu, Limaj bashkë me Selimin e bashkëluftëtarët e tjerë, atë natë “feste” në luftë, vizituan edhe familjet e dëshmorëve.
