Ministria e Industrisë, Ndërmarrësisë, Tregtisë dhe Inovacionit (MINTI) ka nisur një cikël takimesh me rrjetet e marketeve në Kosovë, me qëllim të forcimit të mbrojtjes së konsumatorëve dhe parandalimit të praktikave të padrejta tregtare.
Gjatë takimit të parë, përfaqësuesit e pesë rrjeteve të mëdha të marketeve janë informuar për numrin dhe natyrën e ankesave të konsumatorëve për periudhën janar–shtator 2026.
Sipas të dhënave të MINTI-t, gjatë kësaj periudhe janë regjistruar gjithsej 308 ankesa që kanë të bëjnë me marketet në Kosovë.
Pjesa më e madhe e tyre lidhet me mospërputhjen e çmimit të paraqitur në raft me atë që paguhet në arkë.
Kjo kategori përbën 47,7 për qind të ankesave të regjistruara.
Ndërkaq, ankesat për produkte të skaduara përbëjnë 22,1 për qind, ndërsa 13 për qind kanë të bëjnë me produkte që janë brenda afatit të përdorimit, por që konsiderohen të dyshimta ose të dëmtuara.
Gjatë diskutimeve, përfaqësuesit e marketeve kanë paraqitur sfidat me të cilat përballen në punën e përditshme, duke e veçuar mospërputhjen e çmimeve në rafte dhe në arkë.
Sipas tyre, ndër faktorët që ndikojnë në këtë problem janë mungesa e stafit dhe ndërrimi i shpeshtë i punonjësve.
Në kuadër të takimit, palët janë dakorduar për organizimin e sesioneve të përbashkëta informuese me menaxherët e marketeve, me qëllim të njohjes më të mirë të obligimeve ligjore që rrjedhin nga Ligji për Mbrojtjen e Konsumatorit.
Po ashtu, në këto sesione do të trajtohen edhe masat ndëshkuese që mund të shqiptohen nga Inspektorati Qendror i Mbikëqyrjes së Tregut (IQMT) në rast të shkeljes së legjislacionit në fuqi.
Një tjetër kërkesë e MINTI-t drejtuar rrjeteve të marketeve ishte krijimi i më shumë hapësirave në rafte për produktet vendore, me synim promovimin e tyre dhe rritjen e pranisë në tregun e Kosovës.
Ministria ka bërë të ditur se do të vazhdojë organizimin e nismave të tilla në bashkëpunim me rrjetet e marketeve, për të rritur transparencën në treg, për të forcuar mbrojtjen e konsumatorëve dhe për të parandaluar praktikat e padrejta tregtare./teve1.info/
