Raporti i Progresit për vitin 2023 i shkruar nga Komisioni Evropian për Kosovën, po i qet para gazetarëve zëvendëskryeministrin Besnik Bislimi dhe shefin e zyrës së e BE-së, Tomas Szunyog.
Dialogu dhe lufta ndaj korrupsionit ishin dy temat kryesore që përmban raporti.
Teksa Kosova ishte e vetmja që të mërkurën s’mori rekomandim për nisje të negociatave për rrugën drejt anëtarësimit në Bashkimin Evropian.
Shefi i zyrës së BE-së në Kosovë, Tomas Szunyog, duke folur për raportin tha se përvec arritjeve, pret nga vendi ynë që të bëjë hapa të mëtejshëm, sidomos në çështje të dialogut me Serbinë.
“Raporti e njeh se ka një progres të caktuar duke përfshirë themelimin e kornizës ligjore për zgjedhjet e parakohshme dhe disa çështje që lidhen me depërshkallëzimin në ndërtesat komunale, por raporti thekson se duhet të shohim hapa të tjerë. Shpresojmë që hapat të merren sa më shpejt dhe masat të hiqen sa më shpejtë që Kosova të gëzojë potencialin jo vetëm nga mekanizmat ekzistues por edhe nga plani i rritjes”, tha ai.
Por numri dy i qeverisë nuk po pajtohet me disa nga ato që thuhen në raport.
“Janë disa arritje në segmentin e kritereve politike, përkatësisht në fushën e funksionimit të demokracisë, drejtësisë dhe sundimit të ligjit, luftimit të korrupsionit dhe administratës publike që do të duhej të vlerësohen e theksohen më shumë në këtë raport meqë janë të arritura me shumë rëndësi për një shoqëri demokratike”, tha Bislimi.
Në këtë konferencë të përbashkët, Szunyog foli edhe për mundësinë e heqjes se masave për Kosovën.
“Masat janë implementuar bazuar në deklaratën e 27 vendeve anëtare. Ka qenë reagim ndaj zhvillimeve në fund të majit duke përfshirë sulmin kundër ushtarëve të KFOR-it. Kjo deklaratë është mjaft specifike se çfarë pritet nga Kosova. Pra, janë tri çështje; deeskalimi në veri; zgjedhjet e parakohshme; angazhimi në dialog, duke përfshirë themelimin e Asociacionit”, tha shefi i Zyrës së BE-së në Kosovë
E kur u fol për asociacionin, zëvendëskryeministri kosovar, Besnik Bislmi njoftoi se takimi i radhës i kryenegociatorëve në Bruksel pritet të mbahet me 16 nëntor.
“Takimi i radhës mes kryenegociatorëve mbahet të enjten e ardhshme në Bruksel dhe ky është dakordimi i vetëm që kemi arritur. Ky është hapi i radhës për të cilin jemi dakorduar, d.m.th. takimi i radhës në Bruksel më 16 nëntor”, tha Bislimi.
Ndërkohë në raportin e progresit sa i përket luftimit të dukurive si korrupsioni, vlerësohet se ka përparim por jo mjaftueshëm. Në anën tjetër, kritika janë dhënë edhe për funksionim të sistemit gjyqësor në vend, luftën ndaj ekonomisë joformale.
Derisa, si shqetësuese janë përmendur edhe sulmet ndaj gazetarëve dhe mosmbrojtja e tyre përgjatë punës së tyre sidomos në terren.
Kronika e realizuar nga gazetari, Arton Rama
