Anëtarja e LDK-së, Besa Gaxheri, ka reaguar ashpër ndaj çdo tentimi për ndikim në procesin zgjedhor.
Ajo tha se prekja e votës së dikujt është vepër penale shumë e rëndë dhe e sanksionuar me ligj, dhe se përfundimin e kësaj çështjeje duhet ta japë drejtësia.
“Vepër penale dhe shumë e rëndë. Për t’u prekur vota e dikujt është vepër penale dhe e sanksionuar edhe me ligj. Për këtë s’ka askush nevojë të diskutojë. Në kryesinë e LDK-së e kemi diskutuar këtë çështje shumë shpejt do ta marrim edhe një vendim rreth kësaj çështje. Por, përfundimin e kësaj çështje duhet ta ketë drejtësia dhe t’i merr masat më të rrepta për çdo person të tillë që ka guxuar t’i fus duart aty”, deklaroi ajo në emisionin “Mesditë” në Tëvë1.
Ajo tha se në të kaluarën subjektet politike kanë punuar në drejtimin që Kosova të mburret me proceset zgjedhore.
“Nuk guxon të ndodh kjo dhe ta na prish një proces që kemi nisur të krenohemi me të. Jemi dëshmitarë të gjithë për zgjedhjet e 2021 që është quajtur vjedhja industriale, pas atij procesi ne jemi munduar si institucione që vërtetë të bëjmë ligje dhe e kemi vë në binarë një proces zgjedhor. Kemi qenë një vend që kemi marrë lëvdata për zhvillimin e procesit zgjedhor, tashmë ka nisur të degradohet në masë të madhe ky proces, kjo është e papranueshme”, deklaroi ajo.
Ajo bëri thirrje që Prokuroria të angazhohet maksimalisht për të identifikuar personat përgjegjës, të cilët duhet të përballen me dënimet e tyre. /teve1.info/
