Presidentja e Kosovës, Vjosa Osmani ka thënë se takimet e zhvilluara në kuadër të Edicionit të dytë të Forumit Diplomatik në Antalia ishte një mundësi e shkëlqyer për të takuar dhe diskutuar me homologë e liderë nga mbarë bota mbi rëndësinë e aleancave dhe bashkërenditjes së qëndrimeve e veprimeve karshi zhvillimeve të fundit në Evropë.
Ajo në një postim në Facebook ka shkruar se gjatë Forumit ka zhvilluar takime të shumta me krerë të shteteve të ndryshme botërore, me të cilët ka biseduar mbi zhvillimet në rajon, rëndësinë e përshpejtimit të rrugëtimit drejt BE-së dhe intensifikimin e bashkëpunimit rajonal për tejkalimin e sfidave dhe barrierave.
“Në të gjitha këto takime, së bashku me zëvendëskryeministren Donika Gërvalla, potencuam qëndrimin e Kosovës në raport me zhvillimet rajonale dhe globale. ADF është shndërruar në platformë të përmasave globale për diskutime përmbajtjesore e strategjike, e të cilat u realizuan në një moment tejet të rëndësishëm”, ka shkruar Osmani./Teve1.info/
