Ministria e Drejtësisë nuk po pajtohet me vendimin e Komisioni të Ankesave brenda Institutit të Mjekësisë Ligjore, për kthimin në punë të 4 zyrtarëve të IML-së të cilët ishin suspenduar pas zhdukjes së mostrave të aktivistit të VV-së Astrit Dehari.
Këshilltari i Lartë dhe Shefi Kabinetit të ministres së Drejtësisë, Genc Nimoni, duke konfirmuar kthimin e tyre në punë, ka thënë për teve1.info se ka thënë se si ministri nuk kanë asnjë kompetencë për kthimin ose jo të tyre.
“Legjislacioni në fuqi nuk i jep kompetencën Ministres apo kabinetit lidhur me rastet e tilla. Të dy komisionet kanë pavarësi në vendimmarrje. Siç jeni në dijeni, në rastin e zhdukjes së mostrave në laboratorin e toksikologjisë, Ministrja Haxhiu, ka njoftuar prokurorin dhe ka kërkuar nga drejtori i IML që konform ligjit dhe përgjegjësisë për të ndërmarrë veprime në lidhje me rastin. Pavarësisht ndjeshmërisë së rastit, si Ministri, nuk kemi asnjë kompetencë për kthimin apo mos kthimin e tyre në vendin e punës, pavarësisht që ne nuk pajtohemi me vendimin e tyre. Urojmë që PSRK sa më shpejtë t’i adresojë përgjegjësit në mënyrë që ata të ndiqen penalisht”, ka thënë ai.
Nardi Sheqergjiu, toksikolog mjekoligjor në Institutin për Mjekësi Ligjore, Flutura Goga, udhëheqëse e laboratorit të toksikologjisë në Institutin për Mjekësi Ligjore, Anila Lakna, teknike e laboratorit të toksikologjisë në Institutin për Mjekësi Ligjore, dhe Ilirjana Shala, kimiste në Institutin për Mjekësi Ligjore janë personat e suspenduar nga Komisioni Disiplinor e që Komisioni i Ankesave ka vendosur t’i kthejë në IML.
Ministrja e Drejtësisë, Albulena Haxhiu, më 8 dhjetor të vitit 2022 kishte njoftuar se 12 mostra të Astrit Deharit janë zhdukur nga Laboratori i Toksikologjisë në Institutin e Mjekësisë Ligjore.
Për zhdukjen e këtyre mostrave javën e kaluar deputeti i VV-së, Haki Abazi kishte deklaruar se janë video-incizimet që tregojnë se si u zhdukën ato.
Pas kësaj deklarate ka reaguar edhe Prokuroria Speciale, i cila ka paralajmëruar se Abazi do të intervistohet për këtë çështje.
Aktivisti i Lëvizjes Vetëvendosje, Astrit Dehari, u gjet i vdekur në qelinë e burgut në Prizren në nëntor të vitin 2016, ku po mbahej i paraburgosur nën dyshimin se kishte kryer sulm ndaj ndërtesës së Kuvendit bashkë me disa aktivistë të tjerë. Teksa Prokuroria atëkohë pati thënë se është vetëvrasje, familja në vazhdimësi ka insistuar se bëhet fjalë për vrasje.
https://teve1.info/lajmet/kthehen-ne-pune-te-suspenduarit-per-rastin-e-mostrave-te-astrit-deharit/
