Deputeti i Lëvizjes Vetëvendosje, Haki Abazi, deklaroi se audio-incizimet mund ta konfirmojnë se kush i ka zhdukur mostrat e Astrit Deharit.
Gjatë një konference të thirrur për media nga vet Abazi, ku sipas tij, kryeministri Albin Kurti e ka urdhëruar largimin e tij nga pozita e drejtuesit të Komisionit Parlamentar për Punë të Jashtme, Abazi tha se shkarkimi i tij nuk mund të krahasohet me zhdukjen e mostrave të rastit Dehari.
“Audio incizimet konfirmojnë diskutimin mes Saranda Bogujevcit, Mimoza-Kusari – Lila, për ngulfatjen e zërit të deputetëve për brenda parlamentit. Video -incizimet janë ato të cilat ju duhet t’i kërkoni për të konfirmuar se kush ka zhdukur mostrat e Astrit Deharit. Hulumtimi im i fundit, pyetjet e mija që kam shtruar, diskutimet që kam bërë me njerëz përgjegjës, kanë sjellë tek shkarkimi për brenda Lëvizjes Vetëvendosje. Shkarkimi im është minor kundrejt borxhit që kemi për ta sqaruar deri në fund se çfarë ka ndodhur me rastin Dehari dhe si është e mundur që në pushtetin e VV-së, të zhduken mostrat e Astrit Deharit. Por, kryeministri Kurti nuk e ka thënë asnjë fjalë të vetme për këtë gjë”, deklaroi Abazi para medieve.
Madje sipas tij, lidhur me zhdukjen e mostrave për rastin Dehari, Prokuroria duhet ta marrë në pyetje kryeministrin Albin Kurti, Dehona Mihajllin, Albulena Haxhiun, Nazlie Balaj dhe Flutura Gogaj-Bajrami.
“Nuk besoj që kamerat mund të gënjejnë se çfarë ka ndodhur. Rasti i Astrit Deharit është shumë i rëndë për t’u mbajtur mbi supet e qytetarëve. Rrugët janë të qarta se si duhet të bëhet kjo punë”, potencoi Abazi tutje.
Njëherit, Abazi shtoi se Instituti i Mjekësisë Ligjore është i monitoruar deri në fund, derisa theksoi se tanimë dihet qartë se kush ka hyrë tek frigoriferi dhe ka nxjerrë mostrat të cilat kanë qenë të vendosura nën mostrat tjera, e që tani ato veçse janë zhdukur./teve1.info/.
