Afro një milion euro është shuma që u është bllokuar Komunës së Vitisë, e që përfshijnë detyrimet financiare nga kontratat kolektive për arsim dhe shëndetësi.
Kjo si pasojë e mbylljes së sistemit të pagesave nga ana e Ministrisë së Financave, ku ajo së bashku me dikasteret e tjera janë nënshkruese të kontratave.
Komuna e Vitisë vlerëson se me këtë veprim, niveli lokal rrezikon bankrotin.
“Tash i kemi afro 800 mijë euro që burojnë nga kontratat kolektive, ku ne penalizohemi pa të drejtë dhe nga thesari natyrisht mirren mjetet aty ku ne kemi nevojë më së shumti. Tash në këtë rast, e kemi edhe një situatë sui generis le të themi, për shkak se është bllokuar sistemi dhe vërtetë është e papranueshme që me bankrotu komunat si pasojë e një vendimi që mund të zëvendësohet me mjete financiare që Qeveria i ka të bollshme”, ka thënë kryetari i kësaj komune Sokol Haliti.
Dëmtime buxhetore nga kontratat kolektive, në shifra milionëshe ka edhe komuna e Podujevës.
“Deri tash kemi paguar mbi 6 milion euro shpenzime në emër të realizimit të atyre pagesave që lidhen me kontrata kolektive. Kjo sigurisht që na dëmton shumë, edhe në kuptim të projekteve që janë planifkuar nga komuna, por është ka bëhet edhe një dëmtim i përgjithshëm në kupimt të buxhetit total të komunës së Podujevës”, ka thënë Shpejtim Bulliqi kryetar i Podujevës.
Vendimi për bllokim të sistemit të pagesave, po shihet si gabuar.
“Vendimet e tilla, pa një analizë të mirë dhe pa konsultën e qeverive lokale, e krijon një bllokim total të funksionimit të komunave dhe e cënon të drejtën e tyre të funksionimit të qeverive lokale dhe Kushtetua e cila i jep të drejtë. Nuk mund asnjë institucion qendror të kufizojë komunat”, ka thënë Kenan Gashi nga AVONET.
Shqetësimet me këtë situatë, janë ngritur edhe nga Asociacioni i Komunave.
Nga Ministria e Financave, nuk kanë kthyer përgjigje për arsyen e këtij vendimi dhe mundësitë e zhbllokimit të sistemit.
