Ministrja e Drejtësisë, Albulena Haxhiu, e ka cilësuar si tentim për zhagitje reformash dërgimin e Ligjit për Byronë e Verifikimit në Gjykatën Kushtetuese nga Partia Demokratike e Kosovës.
Haxhiu ka thënë se reformat që i kanë nisur si ministri mund të luftohen e sabotohen, por nuk mund t’i ndalojë askush, aq më shumë ata që janë përgjegjës për shkatërrimin e institucioneve.
“Dërgimi i Ligjit për Byronë për Verifikimin dhe Konfiskimin e Pasurisë së Pajustifikueshme në Gjykatën Kushtetuese, ka për qëllim zhagitjen e reformave. Mund të luftohen e sabotohen, por reformat që kemi nisur në shumë drejtime përbrenda sistemit të drejtësisë tashmë kanë marrë drejtimin e duhur dhe nuk mund t’i ndalojë askush, aq më shumë ata që janë përgjegjës për shkatërrimin e institucioneve”, ka thënë ajo përmes një postimi në Facebook.
Tutje, ajo është treguar e vendosur që byroja do të bëhet dhe që sipas saj, drejtësia do të triumfojë.
“Byroja do të bëhet. Drejtësia do të triumfojë”, ka shkruar ministrja.
Mes tjerash ajo ka shkruar se: “Për të qenë edhe më korrekt, pas kërkesës së opozitës dhe para miratimit në parim, projekt-ligjin e dërguam edhe në Komisionin e Venecias si institucionin më kredibil për demokraci nëpërmjet ligjit. Pasi kaloi të gjitha hallkat e verifikimit më në fund u soll në Kuvend për t’u votuar në leximin përfundimtar. Nuk ka institucion më të lartë në kontinentin tonë për të shuajtur dilemat e opozitës sesa Komisioni i Venecias. Madje edhe vet Gjykata Kushtetuese në rastet sidomos më komplekse, konsultohet me Komisionin e Venecias”.
Sot, PDK e ka dërguar në Gjykatë Kushtetuese Projektligjin për Byronë Shtetërore. Për teve1.info këtë e ka bërë të ditur koordinatori i Departamentit për Drejtësi në kuadër të Kabinetin e Qeverisjes së Mirë në PDK, Përparim Gruda.
