Në njoftimin për media nga Zyra e Kryeministrit, kanë bërë të ditur se në këtë takim, Bislimi ka folur mbi prioritetet e Qeverisë në agjendën ambicioze të këtij viti në integrimin evropian.
“Pas aplikimit për anëtarësim në Këshillin e Evropës, Kosova synon të aplikojë për anëtarësim në BE brenda këtij viti. Çështje tjetër me rëndësi ishte dhe tema e liberalizimit të vizave për qytetarët e Kosovës, ku u theksua nevoja për përfundimin e këtij procesi dhe pritjes së gjatë për qytetarët e Republikës së Kosovës”, thuhet në njoftim.
Po ashtu, Bislimi e njoftoi Wilfing dhe delegacionin për avancimet që ka bërë Kosova në zhvillim ekonomik, sundimin e ligjit, demokratizimin, luftimin e krimit të organizuar dhe korrupsionit.
“Përballimi i sfidave të përbashkëta, siç është aktualisht kriza energjetike dhe inflacioni ishin tema të tjera të diskutimit. Zëvendëskryeministri Bislimi e falënderoi delegacionin për vizitën duke theksuar partneritetin e ngushtë me shtetin e Austrisë dhe gatishmërinë e plotë për avancimin e bashkëpunimit mes nesh”, thuhet më tej në njoftim. /teve1.info/
