Punëtorët e Korporatës Energjetike të Kosovës kanë vendosur të pezullojnë përkohësisht protestën e paralajmëruar për rritjen dhe nivelizimin e pagave, si dhe për realizimin e pagës së 13-të.
Lajmin e ka bërë të ditur kryetari i Sindikatës së Re të KEK-ut, Xhelal Jashari, i cili ka thënë se ky vendim është marrë pas takimeve me menaxhmentin dhe bordin e korporatës.
Sipas Jasharit, gjatë takimeve është shprehur gatishmëria për shqyrtimin e kërkesave të sindikatës dhe gjetjen e një zgjidhjeje përmes dialogut.
Ai ka bërë të ditur se për këtë çështje janë zhvilluar takime edhe me punëtorët në të tri divizionet e KEK-ut: në divizionin e prodhimit të qymyrit, në termocentralin Kosova A dhe në termocentralin Kosova B.
“Menaxhmenti dhe bordi kanë shprehur vullnet dhe gatishmëri për t’i shqyrtuar kërkesat, kështu që, me mirëkuptimin e të dyja palëve, sot kemi pasur takime në të tri divizionet me të gjithë punëtorët dhe kemi marrë konfirmimin për një pezullim të përkohshëm të protestës, derisa të shqyrtohen kërkesat në tërësi”, ka deklaruar Jashari.
Ai ka theksuar se sindikata pret rezultate konkrete nga këto diskutime, ndërsa ka paralajmëruar se punëtorët do të njoftohen për çdo zhvillim të ri.
Jashari ka bërë të ditur se protesta nuk është hequr përfundimisht nga opsioni dhe se ajo mund të rikthehet nëse nuk arrihet marrëveshje dhe kërkesat e punëtorëve nuk marrin përgjigje konkrete.
“Me vetë faktin që kemi thënë se e kemi pezulluar përkohësisht protestën, kjo tregon se kemi një afat të limituar për rezultate, në mënyrë që t’i japim hapësirë dialogut. Në momentin kur nuk ka dialog, nuk shterohen mundësitë e shqyrtimit të kërkesave dhe nuk ka rezultate, pa diskutim që ne e kemi opsionin e protestës”, ka thënë Jashari.







