Pasi shënoi gol të shkëlqyer në eliminimin e Real Madridit nga Kupa e Mbretit, Antoine Griezmann edhe një herë tjetër e eklipsoi Jude Bellinghamin në duelin e lojtarëve që konsiderohen më vendimtarët në Spanjë.
Griezmanni fitoi topin në duel me Vinicius Juniorin, vrapoi nga krahu i djathtë dhe depërtoi në zonë, për të gjuajtur më pas fuqishëm nga një kënd i vështirë. Ai shënoi gol duke e dërguar topin pak mbi shpatullat e portierit Andriy Lunin. Ishte goli i tretë në kohën shtesë, që e dërgoi Atleticon në epërsi, në ndeshjen të cilën në fund Atletico Madridi e fitoi 4:2 në Kupën e Mbretit të enjten mbrëma.
“Zëvendësuesit tanë i dhanë shtytje lojës dhe lojtari magjik si Griezmanni e kreu punën”, tha trajneri i Atleticos, Diego Simeone, kur u pyet se çka ndikoi që skuadra e tij kaloi në çerekfinale.
Real Madridi ka vetëm dy humbje në 29 ndeshje në të gjitha garat në këtë kampanjë, përfshirë Ligën e Kampionëve. Të dy humbjet kanë ardhur nga Atletico Madridi.
Griezmann po ashtu shënoi gol në fitoren e Atleticos 3:1 ndaj Realit në ligën spanjolle në muajin shtator. Ai ishte shënues edhe në gjysmëfinale të Superkupës së Spanjës në Arabinë Saudite, kur Atletico humbi 5:3 nga Reali në vazhdime.
Në fitore apo humbje ndaj rivalit më të madh të Atleticos, Griezmanni ka dhënë maksimumin për skuadrën e tij dhe ka vepruar si organizator duke ndihmuar në mesfushë edhe në fazën defensive – kushti që Simeone kërkon nga lojtarët për të qenë pjesë e skuadrës.
Këto paraqitje vijnë nga një lojtar të cilin Barcelona e ktheu në Atletico pas dy edicioneve jo pozitive, pasi ai asnjëherë nuk shfaqi talentin që e ndihmoi Francën ta fitojë Kupën e Botës 2018.
Qëkur Griezmann u kthye në Atletico në shtator të vitit 2021, u duk se ai nuk ishte larguar kurrë. 32-vjeçari e shkroi emrin e tij në historinë e Atleticos duke u bërë golashënuesi më i mirë në histori. Klubi e nderoi këtë të arritur të enjten me fanellën me numrin 174. Francezi e theu rekordin e Luis Aragonesit.
Griezmann më pas shënoi golin e 175-të në fitoren ndaj Realit.
“Kemi qenë me fat që e kemi mposhtur Realin dy herë dhe është e vërtetë se jemi shumë të fortë në shtëpi”, tha Griezmann. “Jam shumë i lumtur me përkushtimin e gjithë skuadrës. Jemi të lodhur dhe nuk kemi shumë kohë për pushim”.
Përderisa Griezmann vazhdoi shkëlqimin kundër Realit, Atletico ka treguar edhe një herë tjetër se është prej klubeve të rralla që mund ta mbajë Bellinghamin të qetë.
Bellinghami e qëlloi transversalen në ndeshjen e së enjtes, ndërsa asistoi për Joselu Maton në golin e barazimit, 2:2.
Bellinghami shpejtë është kthyer në lojtar të klasit botëror qëkur u transferua në Madrid nga Borussia Dortmundi në verën e kaluar. 20-vjeçari ka shënuar 17 gola, përfshirë 13 në ligë. Ka qenë prej meritorëve që Reali është në krye të tabelës, me vetëm një pikë prapa Gironas.
Griezmanni është me një gol më shumë se Bellinghami aktualisht. Atletico megjithatë ka pasur disa humbje në ligë në raundet e fundit dhe zë pozitën e pestë me 10 pikë prapa Realit.
Reali e ka shansin e revanshit, pasi më 4 shkurt Atletico viziton “Santiago Bernabeun” në ndeshje në ligë.
“Atletico, njësoj si ne, bëri përpjekje të jashtëzakonshme. Askush nuk meritoi të humbë. Ne humbëm, por duhet të shikojmë para”, ka thënë trajneri Carlo Ancelotti. “Tani kemi dy javë për të punuar mirë e për ta përmirësuar gjendjen fizike”, theksoi tekniku italian i Real Madridit.
