Presidentja e Kosovës, Vjosa Osmani ka kujtuar 26-vjetorin e masakrës në Beleg, ku mbetën të vrarë 46 shqiptarë nga regjimi gjenocidal i Serbisë.
Osmani ka thënë se kjo ka qenë një nga masakrat më të mëdha të kryera nga forcat paramilitare serbe.
“Një çerek shekulli më parë, në oborrin e një shtëpie në Beleg të Deçanit, forcat policore, ushtarake dhe paramilitare të regjimit gjenocidal të Serbisë ndanë burrat dhe të miturit nga gratë dhe më pas ekzekutuan e masakruan 46 shqiptarë. Kjo ishte një nga masakrat më të mëdha të kryera nga forcat paramilitare serbe, të cilat në vitin 1999 nisën një ofansivë të egër ndaj popullatës civile. Edhe sot, pas kaq vitesh, fati i disa banorëve të zhdukur me dhunë nuk është zbardhur, ndaj plagët mbeten të hapura për familjet dhe për gjithë Kosovën. Drejtësia mbetet borxh ndaj tyre dhe ndaj historisë sonë”, ka shkruar Osmani në Facebook./teve1.info/
