Presidenti i sapozgjedhur i Malit të Zi, Jakov Milatoviq, pret që në inaugurimin e tij të shtunën e ardhshme në Podgoricë të marrin pjesë të gjithë liderët e vendeve të rajonit.
“Janë të ftuar të gjithë presidentët e vendeve të rajonit dhe në frymën e një politike të marrëdhënieve të fqinjësisë së mirë, të cilën Mali i Zi dëshiron ta ketë me të gjithë fqinjët, mendoj se ardhja e tyre do të ishte një mesazh i mirë për Bashkimin Evropian dhe për komunitetin e gjerë ndërkombëtar për bashkëpunimin brenda rajonit”, tha ai, shkruan Danas.
Ai ka shtuar se në një bisedë telefonike me shumë prej tyre, ka marrë një mesazh të mirë se ka interesim për të marrë pjesë.
“Po mendoj edhe për anëtarët e Presidencës së Bosnje-Hercegovinës dhe Vuçiqin, Presidentin e Shqipërisë dhe shumë të tjerë”, tha Milatoviq.
Siç ka shtuar ai, ka marrë konfirmimin se në inaugurim do të marrin pjesë shumë zyrtarë të lartë të SHBA-së, Britanisë së Madhe, Francës dhe Gjermanisë “që është një sinjal i mirë i besimit dhe respektit të ndërsjellë mes Malit të Zi dhe atyre vendeve”.
Siç tha ai, disa nga lëvizjet e para në pozitën e kreut të shtetit do të jenë rishikimi i ligjeve të ardhshme të miratuara gjatë Kuvendit të shpërndarë.
