Avokati, Skënder Musa ka vlerësuar se nuk ekziston asnjë pengesë që nesër të konstituohet Kuvendi i Kosovës, as për formimin e Qeverisë së re të vendit.
Musa ka vlerësuar pozitivisht edhe dakordimin e partive politike që pesë nënkryetarët e Kuvendit të votohen në pako, duke theksuar se kjo qasje shmang bllokadat institucionale.
“Sa i përket dakordimit që pesë nënkryetarët e Kuvendit të votohen në pako, kjo është pozitive, pasi nuk ka nevojë për bllokada. Problemet në të kaluarën nuk janë shkaktuar nga partitë opozitare, por nga vetë partia që ka fituar shumicën. Tani, siç duket, ajo është e kënaqur me rezultatin zgjedhor dhe është pajtuar që të shkohet në pako”, ka thënë Musa.
I pyetur nëse një dakordim i tillë ka mundur të arrihej edhe herën e kaluar, në vend që të krijohej një bllokadë disa mujore, Musa është shprehur se një situatë e tillë ka qenë e pakuptimtë nga aspekti juridik.
“Është nonsens nga këndvështrimi juridik dhe i rregullimeve shtetërore. Është shumë e rrallë që partitë në pushtet të bëjnë obstruksione në formimin e institucioneve, siç ka ndodhur në zgjedhjet e fundit në Kosovë. Pikërisht partia që ka fituar shumicën ka bërë obstruksione në zgjedhjen e kryesisë së Kuvendit. Ka qenë e pakuptimtë edhe atëherë që nënkryetarët të ndahen sipas parimit të shumicës dhe pakicave”, ka theksuar ai.
Ndryshe, kryetari i legjislaturës së kaluar të Kuvendit të Kosovës, Dimal Basha, nga Lëvizja Vetëvendosje, ka njoftuar se ka pasur konsensus të 14 kryetarëve të subjekteve politike që në seancën konstituve të së mërkurës, të pesë nënkryetarët e Kuvendit të Kosovës të votohen në pako.
