23 vjet më parë, në Lagjen e Boshnjakëve në Mitrovicën e Veriut u vranë e u masakruan 11 civilë. Nga banorët u kërkua vëmendje në ruajtjen e kujtesës kolektive, derisa ministri i Kulturës, tregoi se kjo duhet të paraprihet nga veprime të tjera.
Janë vetëm disa nga shenjat e sulmeve të para 23 viteve. Në këtë ndërtesë të Lagjes së Boshnjakëve në Mitrovicën e Veriut,u masakruan 11 shqiptarë nga forcat serbe.
Megjithë kohën e kaluar, asnjë person nuk doli para drejtësisë, ani pse të mbijetuarit thonë se kishin arritur të identifikonin njërin prej sulmuesve përkundër maskimit të fytyrës.
Vendi ku kishte ndodhur tmerri, do të dilte në shitje, por kjo u parandalua, duke u kthyer në një muze nga përfaqësuesi i fshatit.
Në përvjetor erdhi edhe ministri i Kulturës, Hajrullah Çeku, e deputetë të pozitës. Nga këtu, Çeku u zotua për angazhim në ruajtjen e kujtesës kolektive, por së cilës duhet t’i paraprijnë veprime të tjera.
Përpos të masakruarve më 15 prill, gjatë luftës së fundit në Kosovë, në pjesën veriore u vranë e u masakruan edhe dhjetëra civilë të tjerë.
Raporti i gazetares Florijeta Dernjani.
