Ushtruesi i Detyrës së Kryeprokurorit, Besim Kelmendi, ka dërguar telegram ngushëllimi me rastin e vdekjes së gazetarit dhe dramaturgut, Haqif Mulliqit, raporton teve1.info
Përmes një komunikate për medie nga zyra e Kryeprokurorit, thuhet se profesori dhe dramaturgu Haqif Mulliqi ishte shembull i vlerave më të larta njerëzore i cili me përkushtim e dinjitet i shërbeu vendit të tij.
“E nderuara familje Mulliqi,
Me pikëllim dhe dhimbje të thellë mora lajmin e papritur për ndarjen nga jeta të familjarit tuaj dhe mikut tim të çmuar, z. Haqif Mulliqi.
Ai do të mbetet përherë në kujtesën time si një mik dhe bashkëpunëtor i veçantë me të cilin kemi bashkëndarë momente gëzimi e shumë herë edhe sfiduese përgjatë rrugëtimit tonë profesional në shërbim të kauzës kombëtare.
Haqifi ishte shembull i vlerave më të larta njerëzore, i cili me përkushtim, dinjitet dhe profesionalizëm të lartë i shërbeu vendit të tij.
Shoqëria jonë ishte me fat që në mesin e vet e kishte një gazetar, publicist dhe dramaturg eminent siç ishte Haqif Mulliqi. Vdekja dhe largimi i tij nga kjo botë është humbje e madhe jo vetëm për Ju si familje, por edhe për gjithë komunitetin e gazetarëve, artisteve dhe shtetin tonë.
Andaj, me lejoni që të bashkëndajë me Ju dhimbjen time dhe t’iu shpreh ngushëllimet me të sinqerta për kalimin në amshim të z. Haqif Mulliqi.
Miku im i dashur pushoftë në paqe!”, thuhet në telegramin e ngushëllimit të Kelmendit.
