Këshilli për Mbrojtjen e të Drejtave dhe Lirive të Njeriut, (KMDLNj), ka kërkuar që t’u hiqet licenca kompanive të cilat nuk ofrojnë siguri për punonjës në vendin e punës, raporton teve1.info
Përmes një komunikate për medie, KMDLNj, ka shprehur shqetësim për numrin e lartë të lëndimeve apo edhe vdekjeve në vendin e punës.
Sipas KMDLNj, në 99 për qind të rasteve pësojnë punëtorët ndërsa në 1 për qind të rasteve dënohen simbolikisht punëdhënësit lidhur me lëndimet apo vdekjet në vend të punës.
“KMDLNj ka kërkuar dhe e përsërit se duhet t’u heqjet licenca e punës për punëdhënësit që nuk sigurojnë kushte për punë me ç’rast rrezikohet jeta e të punësuarve. Për KMDLNj-në është brengosëse humbja e jetës të punëtorëve, e në disa raste në mesin e të cilëve ka persona të mitur”, thuhet në reagimin e KMDLNj-së.
KMDLNj ka shprehu shqetësim edhe me numrin e vogël të inspektimeve dhe siç thuhet në reagim, dënimet simbolike të shqiptuara ndaj kompanive.
“Inspektorati i Punës së Kosovës nuk ka kapacitet t’i mbulojë të gjitha vendpunimet për shkak se numri i inspektorëve është në shpërputhje të madhe me kërkesat për inspektim. KMDLNj, gjithashtu shpreh mospajtim të madh për dënimet e shqiptuara e të cilat janë tejet simbolike”, thuhet në komunikatë.
