Të enjten në mëngjes, një rrëshqitje dheu goditi një zonë rurale në provincën jugperëndimore Guizhou të Kinës, duke lënë të bllokuar 21 persona, sipas autoriteteve.
Ekipet e shpëtimit u dërguan menjëherë në fshatin Qingyang, ku tetë familje me gjithsej 19 persona u bllokuan nga rrëshqitja, ndërkohë që një rrëshqitje tjetër goditi qytezën përreth, Changshi, raportoi AP.
Fshati ndodhet në një zonë të thellë malore. Sipas transmetuesit shtetëror CCTV, për të ndihmuar në përpjekjet e shpëtimit janë angazhuar 120 pjesëtarë të Ushtrisë Çlirimtare Popullore dhe milicisë lokale, si dhe 60 policë ushtarakë.
Një banor i zonës tregoi për median shtetërore se reshjet e shiut kishin zgjatur gjithë natën. Pamjet ajrore të marra me dron shfaqnin një shtresë të madhe dheu ngjyrë kafe që kishte rrëshqitur poshtë një shpat mali me vegjetacion të dendur.
