Më shumë se tre milionë e 350 mijë shërbime janë dhënë vitin e kaluar nga Qendrat e Mjekësisë Familjare në Prishtinë, ndërsa kjo shifër këtë vit është rritur për 10 për qind, ka bërë të ditur drejtori i Shëndetësisë në Komunën e Prishtinës, Izet Sadiku.
Sadiku ka thënë se sfidë për shëndetësinë në kryeqytet mbetet numri i ulët i stafit mjekësor, pasi numri i banorëve nuk është i saktë.
Krahas kësaj, Sadiku ka deklaruar se edhe 200 mijë qytetarë jorezidentë marrin shërbime në Prishtinë.
“Vetëm vitin e kaluar kemi pasur 3 milionë e 350 mijë shërbime, me 1 milion e 100 mijë vizita, sivjet kemi 10 për qind më shumë në gjashtëmujorin e parë në krahasim me gjashtëmujorin e parë të vitit të kaluar. Ju e dini që është e diskriminuar në aspektin negativ Prishtina, për shkak të numrit të vogël të mjekëve dhe infermiereve, për arsye se numri i mjekëve dhe infermiereve për kokë banori për 2000 banorë ndahet sipas numrit të qytetarëve. Prishtina sipas regjistrimit të fundit i ka 190 mijë banorë, a mendon dikush që në Prishtinë jetojnë 190 mijë banorë, unë besoj se ky numër është i dyfishuar. E ne duhet që të japim shërbime edhe për 200 mijë të tjerë të cilët janë jorezidentë, jetojnë dhe veprojnë në Prishtinë, marrin shërbime në Prishtinë e shkojnë rrinë për vikend në qytetet e tyre”, u shpreh Sadiku, raporton EO.
Drejtori i Shëndetësisë në Prishtinë ka thënë se shërbimi shëndetësor shtëpiak ka pasur rekord të shërbimeve brenda ditës.
Ai ka thënë se ky shërbim ka katër ekipe mjekësore në pesë ditë të javës dhe dy ekipe për vikend të cilët japin shërbim nga 12 orë në ditë, në shtatë ditë të javës.
“Kemi arritur që t’i forcojmë shërbimet, një prej atyre që unë krenohem është shërbimi shëndetësor shtëpiak. Këtë shërbim, ne e kemi gjetur kur kemi ardhur, diku ka punuar pesë ditë të javës ka tetë orë, prej orës 7 deri ora 15:00, ka punuar prej të hënës deri të premten, shtune-diel nuk ka pasur shërbim. Prej 1 marsit të vitit të kaluar ne këtë shërbim e kemi bërë 12 orë në shtatë ditë të javës, muajin e kaluar ka pasur rekord të shërbimeve brenda ditës”, ka thënë Sadiku.
E numri i madh i vizitave në emergjencën e QKUK-së, është njëra ndër arsyet kryesore që Prishtinës i nevojitet spitali. Thotë se nga 92 mijë vizita të kryera nga emergjenca e QKUK-së, 38 mijë kanë qenë nga Prishtina.
“Po jap një të dhënë, statistikë e vitit të kaluar, emergjenca Qendrës Klinike Universitare i ka pasur 92 mijë vizita, prej tyre 38 mijë kanë qenë prej Prishtinës”, u shpreh Sadiku, teksa shpreh optimizmin se spitali do të nis këtë vit.
“Kjo është një prej arsyeve që ne jemi në fazën përfundimtare të nisjes së punës së Spitalit të Prishtinës, ne kemi ndarë tokën, kemi ndarë buxhetin jemi duke pritur një plan që është duke e bërë një kompani gjermane, që besojmë diku deri ka fundi i tetorit do të dorëzohet dhe ne menjëherë kemi hapur tender për ndërtimin e spitalit të qytetit. Spitali i qytetit do t’i ketë 196 shtretër, do të jetë spital me standarde evropiane kur 40 për qind e shërbimeve do të jenë jashtë-spitalore. Do t’i rrisim ambulancat specialistike që ta ketë mundësinë pacienti me sëmundje kronike të bëjë kontrolle të rregullta, e jo të shtrihet në spital sepse ai e ngarkon pastaj spitalin”, ka thënë Sadiku.
