Me këtë rast, Kryeministri i Kosovës, Albin Kurti, tha se janë në angazhim të përbashkët që fëmijët e Kosovës të kenë një arsim sa më cilësor, teksa shtoi se kjo fushë është burim i rëndësishëm për zhvillimin e qëndrueshëm ekonomik e shoqëror të vendit, andaj, theksoi se Qeveria Kurti do investojë vazhdimisht në këtë drejtim.
“Edukimi në fëmijërinë e hershme, ngritja e cilësisë së arsimit parauniversitar, harmonizimi i arsimit dhe aftësimit profesional me zhvillimin e teknologjisë dhe tregun e punës, cilësia, integriteti dhe konkurrueshmëria në arsimin e lartë, si dhe përdorimi i teknologjisë digjitale për përmirësimin e shërbimeve në arsim, janë pikat kryesore të Strategjisë. Jemi në angazhim të përbashkët për jetësimin e objektivave të kësaj Strategjie që fëmijëve tanë të ju mundësojmë arsimim cilësor. Në këtë drejtim, Qeveria e Kosovës e ka prioritet sektorin e arsimit, si burim kryesor i zhvillimit ekonomik të vendit dhe shoqërisë në përgjithësi”, ka deklaruar Kurti, raporton teve1.info.
Ndërkaq, Ministrja e Arsimit, Arbërie Nagavci, tha se kjo mënyrë e strategjisë, është dokumenti bazë për zhvillimin e arsimit.
Gjithashtu, ka njoftuar se në vitin e ardhshëm do ketë rritje të buxhetit për arsim.
“Kjo Strategji është dokumenti bazë për zhvillimin e arsimit në pesë vitet e ardhshme, ndërsa lansimi i saj është meritë dhe sukses i të gjithë atyre që kanë kontribuar në finalizimin e saj. Gjithëpërfshirja është kusht i domosdoshëm për zhvillimin e secilit individ dhe për këtë është duke u punuar në përmirësimin e infrastrukturës ligjore. Vitin e ardhshëm do të ketë rritje të buxhetit për arsim, me qëllim të investimit në infrastrukturë fizike”, ka shtuar tutje Nagavci.
