Besimtarët mysliman në Kosovë sot festojnë Kurban Bajramin.
Sekretari i Bashkësisë Islame, Ahmet Sadriu, i ftuar në Tëvë1 në një emision special kushtuar kësaj feste, tregoi se prerjen e Kurbanit e kanë obligim ta prenë ato familje të cilat e kanë rritur nivelin e pasurisë.
Më tej, Sadriu tregoi se shpërndarja e Kurbanit duhet të bëhet në tre pjesë.
“Kryefamiljari e ka obligim therjen e Kurbanit, normalisht ai që ka pasuri. Ai që e ka rritur nivelin e pasurisë është I obliguar ta presë Kurbanin në emër të familjes. Çështja e therjes së Kurbanit e ka një rëndësi të veçantë, sepse ai kur prehet ndahet në 3 pjesë. Një pjesë është për të varfrit, një pjesë është për farefisin, ndërsa pjesa tjetër është për familjen e vet. Kështu që ka edhe karakterin e solidaritetit. Në ditën e Bajramit atyre familjeve të varfra iu pasurohet sofra përmes mishit të Kurbanit”, deklaroi Sadriu në Tëvë1.
Sadriu bëri të ditur se koha më e preferuar për prerjen e Kurbanit është menjëherë pas faljes së Bajramit, shkruan teve1.info.
Ndërkaq, i pyetur se sa kurbanë ka arritur të grumbullojë Bashkësia Islame, ky i fundit tregoi se numri ka arritur deri në 13 mijë.
“Çështja e organizimit për prerjen e kurbanëve është një projekt shumë i madh. Sot ka arritur diku numri 12 deri në 13 mijë kurban që grumbullohen, e pastaj vijnë na e dorëzojnë në Bashkësinë Islame dhe ky është një amanet që e kryejmë me përgjegjësinë me të madhe. Kështu që, edhe këtë vit kemi vepruar njëjtë sikur në vitet tjera, kemi arritur të grumbullojmë dhe ta bëjmë prerjen e tyre sipas dispozitave ashtu siç kërkohet”, shtoi tutje ai.
Festa e Kurban Bajramit vjen pas përfundimit të haxhit i cili është një nga pesë shtyllat e fesë Islame./teve1.info/.
