Zarife Kozhani, punëtore teknike në Universitetin e Prishtinës, tha se në rast që nuk u plotësohet kërkesa për ngritje të pagës, do t’i bllokojnë fakultetet, në koordinim me studentët e UP-së.
Përmes një lidhjeje direkte Tëvë1, Kozhani tregoi se të mërkurën s’do të ketë protesta për shkak të skadimit të kontratave, por në momentin e marrjes së kontratave të reja, do të vazhdojnë përsëri.
“Nuk do t’i lëmë të hyjnë brenda askënd. Do t’i bllokojmë edhe fakultete së qoftë se nuk bëhet paga si e kërkojmë ne. Kemi informata që edhe fakultetet e tjera do të bashkëngjiten në këtë protestë, e që s’do t’i lëmë të hyjnë brenda në fakultete. Greva për momentin është pezulluar nga sot, për shkak se neve na kalon kontrata sot. Kur t’i marrim kontratat e reja do të vazhdojmë përsëri me grevë, në koordinim me studentët që do të na ndihmojnë, do t’i mbyllim fakultetet, sepse me një pagë 290 euro s’mund të punojmë. Tani na kanë ofruar pagën 320 euro bruto, që do të thotë 290 euro neto”, deklaroi Kozhani në emisionin “Ditari”.
Më tej, Kozhani tha se me pagën e tanishme, është e pamundur ta fillojnë punën,
“Ne kërkojmë të kemi pagën 400 euro. Nëse s’ka protesta, nesër fillon puna, mirëpo në momentin që I marrim kontratat e reja, do të vazhdojmë përsëri me grevën, në koordinim me studentët e UP-së”, potencoi tutje Kozhani.
E pyetur se kur pritet t’i marrin kontratat e reja, Kozhani tha se brenda kësaj jave pritet t’ua japin./teve1.info/.