Zijadin Sela nga Aleanca për Shqiptarët në Maqedoninë e Veriut, tha se kandidati i opozitës shqiptare, Arben Taravari, ka bërë komplot gjatë zgjedhjeve lokale të mbajtura më 20 gusht në Tetovë.
I ftuar në Tëvë1, Sela vlerësoi se mbajtja e atyre zgjedhjeve lokale, u bë me qëllim për t’i dobësuar pozicionet e subjektit Aleanca për Shqiptarët.
“Nëse politikanit i mungon intuita, s’është për atë punë. E kisha shumë të qartë se ç’ndodhi në periudhën kur unë u detyrova të jap dorëheqje, për shkak të një rezultati i cili ishte i dobët në zgjedhjet lokale në Tetovë që ishin vetëm për këshilltarët. Ato mbaheshin në kulmin e pushimeve, që pak a shumë merrte nuancat e një konstrukti që i bëhet Aleancës për Shqiptarët, në mënyrë që t’i dobësohen pozicionet si subjekt politik i fuqishëm. Në këto zgjedhje, kuptohet që kishte komplot dhe lëvizje të dyshimta të ish-kryetarit. Unë kam dashur të parandaloj atë që i ndodhi sot Aleancës për Shqiptarët”, deklaroi Sela në emisionin “Këndi i Debatit”.
Ndërkaq, sa i përket dorëheqjes së tij nga posti i kryetarit të partisë Aleanca për Shqiptarët, Sela tha se këtë vendim e mori më shumë për Gostivarin, e jo Tetovën.
“Kur më pyesin shumë se pse kam dhënë dorëheqje për Tetovën, e vërteta është që unë kam dhënë dorëheqje për Gostivarin, në mënyrë që të mos ripërsëritet skenari i njëjtë. Ashtu siç po lëvizin gjërat ka ide tjera, ka ndërhyrje nga jashtë, nga subjektet politike shqiptare dhe joshqiptare”, potencoi Sela tutje./teve1.info/.
